මෙක්සිකෝවේ ප්රබලතම මත්ද්රව්ය කර්ටෙල් නායකයෙකු වන නෙමේසියෝ “එල් මෙන්චෝ” (El Mencho) ගේ වැඩිමහල් දියණිය වන ජෙසිකා ජොහානා ඔසෙගුවේරා ගොන්සාලෙස් (Jessica Johanna Oseguera Gonzalez), කැලිෆෝනියාවේ වින්චෙස්ටර් (Winchester) ප්රදේශයෙන් සුඛෝපභෝගී මාලිගාවක් මිලදී ගැනීමත් සමඟ ප්රදේශවාසීන් අතර දැඩි නොසන්සුන්තාවයක් හටගෙන තිබේ. “ලා නීග්රා” (La Negra) යන අන්වර්ථ නාමයෙන් හඳුන්වන ඇය, මත්ද්රව්ය ජාවාරම් හරහා උපයන මුදල් විශුද්ධිකරණය කිරීමේ චෝදනාවට ඇමෙරිකාවේ සිරදඬුවම් විඳ 2022 වසරේදී නිදහස් වූ තැනැත්තියකි.
ඇයගේ මෙම නව පදිංචිය සහ එහි සිදුවන අභිරහස් කටයුතු පිළිබඳ තොරතුරු මෙසේය. ඇය මෙම නිවස 2023 සැප්තැම්බර් මාසයේදී ඇමෙරිකානු ඩොලර් 590,000ක (රුපියල් මිලියන 170කට අධික) මුදලක් මුදලින්ම (Cash) ගෙවා මිලදී ගෙන ඇත. නිවස මිලදී ගැනීමෙන් පසු එහි සිදුකරන අධික වියදම් සහිත ප්රතිසංස්කරණ පිළිබඳව අසල්වැසියෝ මවිතය පළ කරති. මිල අධික මාබල් පුවරු, නවීන මුළුතැන්ගෙයි උපකරණ සහ විශාල දොඹකර යොදාගෙන නිවසට ඉහළින් ගෙන ගොස් පසුපස මිදුලේ සිටුවන ලද විශාල ගස් ඇතුළත් මෙම ප්රතිසංස්කරණ සඳහා පමණක් ඩොලර් දස දහස් ගණනක් වැය කර ඇති බව වාර්තා වේ.
එමෙන්ම, මෙම නිවස අසල මෙක්සිකානු බලපත්ර සහිත සුඛෝපභෝගී වාහන නිරන්තරයෙන් ගැවසීම පිළිබඳව ද අසල්වැසියන් සැක පළ කරති. බජා කැලිෆෝනියා (Baja California) ප්රාන්තයට අයත් බලපත්ර තහඩු සහිත වාහන සහ රියදුරන් නොපෙනෙන සුඛෝපභෝගී රථ නිවස අසල නතර කර තිබීමත්, විටින් විට පැමිණෙන ලොරි රථ මගින් භාණ්ඩ ප්රවාහනය කිරීමත් නිසා මෙම නිවස මත්ද්රව්ය ජාලයේ මධ්යස්ථානයක් ලෙස භාවිතා කරන්නේ දැයි ප්රදේශවාසීහු බිය පළ කරති. නිහඬ පරිසරයක් සහිත මෙම ප්රදේශයට ඇයගේ පැමිණීම දැඩි තර්ජනයක් බව ඔවුහු පවසති.
