දකුණු කොරියාවේ ස්ථාපිත කර ඇති ඇමරිකානු හමුදාවන්ට අයත් ඇතැම් අවි ආයුධ මැදපෙරදිග පවතින යුදමය වාතාවරණය වෙනුවෙන් යළි යෙදවීම වැළැක්වීමට තම රටට හැකියාවක් නොමැති බව දකුණු කොරියානු ජනාධිපති ලී ජේ මියුන්ග් අද (10) ප්රකාශ කළේය. දකුණු කොරියාවේ පිහිටි ඇමරිකානු පැට්රියට් (Patriot) මිසයිල ආරක්ෂක පද්ධති සහ කාලතුවක්කු බලකායන් මැදපෙරදිග යුද බිම වෙත යැවීමට සූදානම් වන බවට පළවන වාර්තා සම්බන්ධයෙන් අමාත්ය මණ්ඩල රැස්වීමේදී අදහස් දක්වමින් ඔහු මේ බව සඳහන් කළේය.
මෙම අවි ආයුධ ඉවත් කිරීම සම්බන්ධයෙන් සෝල් පාලනය සිය විරෝධය පළ කර ඇති නමුත් ඇමරිකානු තීරණ සම්බන්ධයෙන් දැඩි ඉල්ලීම් කිරීමට තම රටට නීතිමය ස්ථාවරයක් නොමැති බව රොයිටර් පුවත් සේවය වාර්තා කරයි. කෙසේ වෙතත් ඇමරිකානු අවි පද්ධති කිහිපයක් රටින් බැහැරට ගෙන යාම උතුරු කොරියාවට එරෙහිව ක්රියාත්මක වන යුද නිවාරක උපායමාර්ගයට (Deterrence strategy) බාධාවක් නොවන බව ද ජනාධිපතිවරයා මෙහිදී අවධාරණය කළේය.
මෙම පියවර මැදපෙරදිග කලාපයේ පවතින උග්ර අවි හිඟය පියවීමට ඇමරිකාව ගත් හදිසි තීරණයක් ලෙස සැලකෙන අතර එය කොරියානු අර්ධද්වීපයේ ආරක්ෂාව පිළිබඳව යම් කනස්සල්ලක් මතු කර තිබේ. දකුණු කොරියාවේ වෙසෙන ඇමරිකානු සෙබළුන් 28,500කගේ ආරක්ෂාව සහ කලාපීය සමතුලිතතාවය පිළිබඳව ඉදිරියේදී ඇමරිකාව සමඟ තවදුරටත් සාකච්ඡා කරන බව ද දකුණු කොරියානු බලධාරීන් ප්රකාශ කර ඇත.
