මැදපෙරදිග කලාපයේ පවතින උග්ර යුදමය වාතාවරණය සහ ගුවන් ගමන් සඳහා එල්ල වී ඇති බාධා සැලකිල්ලට ගනිමින් මේ සතියේ එක්සත් අරාබි එමීර් රාජ්යයේදී පැවැත්වීමට නියමිතව තිබූ ශ්රී ලංකා – ඇෆ්ගනිස්ථාන සීමිත පන්දු වාර ක්රිකට් තරගාවලිය දින නියමයක් නොමැතිව කල් දැමීමට ශ්රී ලංකා ක්රිකට් ආයතනය තීරණය කර තිබේ. පන්දුවාර 20 තරග 3ක් සහ එක්දින තරග 3කින් සමන්විත වූ මෙම තරගාවලිය ඇෆ්ගනිස්ථානය විසින් ශ්රී ලංකාවට එදිරිව ද්විපාර්ශ්වික තරගාවලියක් සඳහා සත්කාරකත්වය සපයන පළමු අවස්ථාව වීමට නියමිතව තිබුණද අමෙරිකාව සහ ඊශ්රායලය විසින් ඉරානයට එල්ල කළ ප්රහාර සහ ඉරානයේ ප්රතිප්රහාර හමුවේ කලාපීය ගුවන් ගමන් අඩාල වීමත් ඩුබායි ගුවන් තොටුපළ තාවකාලිකව වසා දැමීමත් හේතුවෙන් මෙම තීරණය ගෙන ඇත. මේ අතර ශ්රී ලංකා ක්රිකට් කණ්ඩායමේ නව පුහුණුකරු ලෙස දකුණු අප්රිකානු හිටපු සුපිරි ක්රීඩක ගැරී කර්ස්ටන් පත් කර ඇති අතර සනත් ජයසූරිය මහතාගේ ඉල්ලා අස්වීමෙන් පසු හිස් වූ එම ධුරය සඳහා වසර දෙකක කොන්ත්රාත් කාලයක් යටතේ ලබන අප්රේල් 15 වැනිදා සිට ඔහු සිය රාජකාරි ආරම්භ කිරීමට නියමිතය.
