මහජනතාවට සුවපහසු, ආරක්ෂිත, කාර්යක්ෂම සහ විශ්වසනීය පොදු ප්රවාහන පද්ධතියක් ස්ථාපිත කිරීම රජයේ අපේක්ෂාව බවත් එම අරමුණ සාක්ෂාත් කර ගැනීම සඳහා ජාතික ප්රතිපත්තියක් සකස් කිරීමේ කටයුතු මේ වන විට සිදු කෙරෙමින් පවතින බවත් ජනාධිපති අනුර කුමාර දිසානායක මහතා ප්රකාශ කළේය. ප්රවාහන පද්ධතියේ පවතින පැරණි බස් රථ ක්රමයෙන් ඉවත් කරමින් නිසි ප්රමිතියෙන් යුත් නව බස් රථ හඳුන්වා දීමට රජය සැලසුම් සකස් කරමින් සිටින බව ද ජනාධිපතිවරයා මෙහිදී සඳහන් කළේය. මෙම කටයුත්ත ක්ෂණිකව සිදු කළ නොහැකි වුවද වසර කිහිපයක් පුරා සැලසුම් සහගතව කටයුතු කිරීමෙන් මහජනතාවට ගුණාත්මක බස් රථ සමූහයක් ලබා දීම රජයේ ප්රධාන අරමුණක් බව ඔහු වැඩිදුරටත් පැවසීය.
ශ්රී ලංකා ගමනාගමන මණ්ඩලය (ශ්රී ලංකා ගමනාගමන මණ්ඩලය) සඳහා දිවයිනේ සියලුම දිස්ත්රික්ක නියෝජනය කරමින් අලුතින් බඳවා ගත් රියදුරන් 199 දෙනෙකුට සහ කොන්දොස්තරවරුන් 342 දෙනෙකුට පත්වීම් ලිපි ප්රදානය කිරීම වෙනුවෙන් අද (10) පෙරවරුවේ අරලියගහ මන්දිරයේ පැවැති උත්සවයට එක්වෙමින් ජනාධිපති අනුර කුමාර දිසානායක මහතා මෙම අදහස් පළ කළේය. එම අවස්ථාව සනිටුහන් කරමින් ජනාධිපතිවරයා විසින් පත්වීම්ලාභීන් කිහිප දෙනෙකුට සංකේතාත්මකව පත්වීම් ලිපි ප්රදානය කිරීම ද සිදු විය.
අතීතයේදී ශ්රී ලාංකීය ජනතාව සහ ලංගමය අතර පැවති ශක්තිමත් බැඳීම සිහිපත් කළ ජනාධිපතිවරයා, දේශපාලන පත්වීම් සහ විවිධ අක්රමිකතා හේතුවෙන් කාලයාගේ ඇවෑමෙන් පිරිහීමට ලක් වූ මෙම ආයතනය නැවතත් ශක්තිමත් පොදු ප්රවාහන සේවාවක් බවට පත් කිරීම සඳහා අද දින පත්වීම් ලැබූ පිරිස සිය වගකීම් ඉටු කරනු ඇතැයි තමා විශ්වාස කරන බව ද ප්රකාශ කළේය. සියලුම නව පත්වීම්ලාභීන් වෙත ජනාධිපතිවරයා සිය සුබපැතුම් ද එක් කළේය.
