ලංකා විදුලිබල මණ්ඩලයේ වෘත්තීය සමිති ක්රියාමාර්ග හේතුවෙන් සේවයට වාර්තා නොකරන සේවකයින්ට එරෙහිව දැඩි විනය ක්රියාමාර්ග ගන්නා බව එම අනුප්රාප්තික සමාගම්වල කළමනාකාරීත්වය නිවේදනය කරයි. පෙබරවාරි 28 වැනිදා නිකුත් කළ අංක 2477/47 දරන අතිවිශේෂ ගැසට් පත්රය මඟින් විදුලි බල සැපයුම සම්බන්ධ සියලුම සේවාවන් අත්යවශ්ය සේවා බවට පත් කර ඇති බැවින්, සේවයට වාර්තා නොකිරීම බරපතල වරදක් බව පාලනාධිකාරිය පෙන්වා දෙයි.
2024 අංක 36 දරන (සංශෝධිත) ශ්රී ලංකා විදුලිබල පනත අනුව, 2026 මාර්තු 09 වැනිදා සිට ලංවිම කටයුතු ප්රධාන අනුප්රාප්තික සමාගම් හතරක් වෙත පවරා ඇති අතර, දැනට සිටින සියලුම සේවකයින් එම සමාගම් වෙත අනුයුක්ත කර තිබේ. සේවකයින් සඳහා නිල පත්වීම් ලිපි ලබා දීමේ කටයුතු මේ වන විට සිදු වෙමින් පවතින බවත්, ආයතනික ප්රතිසංස්කරණ හමුවේ වෘත්තීය ක්රියාමාර්ගවල නිරත නොවී වහාම සේවයට වාර්තා කරන ලෙසත් කළමනාකාරීත්වය ඉල්ලා සිටියි. අත්යවශ්ය සේවා රෙගුලාසි උල්ලංඝනය කරමින් රාජකාරියට බාධා කරන පිරිස් සම්බන්ධයෙන් නීතිමය ක්රියාමාර්ග ගැනීමට පසුබට නොවන බව ද එම නිවේදනයේ වැඩිදුරටත් සඳහන් වේ.
