ලොව ධනවත්ම පුද්ගලයා වන එලොන් මස්ක් (Elon Musk) ටෙක්සාස්හි බොකා චිකා (Boca Chica) ප්රදේශයේ පදිංචිව සිටින ඩොලර් 50,000ක් වටිනා අතිශය සරල නිවස පිළිබඳව ඔහුගේ මව වන මායේ මස්ක් (Maye Musk) පුවත්පත් සාකච්ඡාවකදී අදහස් දක්වා තිබේ. සිය පුතුගේ නිවසේ ඇති අවම පහසුකම් පිළිබඳව අදහස් දක්වමින් ඇය පවසා ඇත්තේ, තමා එහි යන අවස්ථාවලදී නිවසේ ඇති ගරාජය තුළ නින්දට යන බවයි. රොකට් දියත් කිරීමේ මධ්යස්ථානයක් අසල සුඛෝපභෝගී නිවාස ඉදිකළ නොහැකි බවත්, එලොන් මස්ක් භෞතික සම්පත් කෙරෙහි කිසිදු උනන්දුවක් නොදක්වන බවත් ඇය මෙහිදී වැඩිදුරටත් සඳහන් කර ඇත.
සමාජ මාධ්ය ඔස්සේ සංසරණය වන ඡායාරූපවලට අනුව, මෙම නිවස ඉතා කුඩා ඉඩකඩකින් සමන්විත වන අතර එහි මුළුතැන්ගෙය සහ විසිත්ත කාමරය ඉතා සරල අයුරින් සකස් කර තිබේ. එහි ඇති කෝපි මේසයක් මත ස්පේස් එක්ස් (SpaceX) ආයතනය සිහිගන්වන රොකට් ආකෘතියක්, කටානා (Katana) කඩුවක් සහ පොත් කිහිපයක් පමණක් දැකගත හැකිය. නිවසේ බිත්ති මත කිසිදු විසිතුරු භාණ්ඩයක් නොමැති අතර, අත්යවශ්ය ගෘහ භාණ්ඩ පමණක් එහි අඩංගු වේ. සියලු දේපළ විකුණා දමා සරල දිවියක් ගත කරන බවට එලොන් මස්ක් කළ ප්රකාශය මෙම නිවසේ අභ්යන්තර දර්ශන හරහා තහවුරු වන බව විදෙස් මාධ්ය පවසයි.
