කැනඩාවේ ටොරොන්ටෝ නුවර පිහිටි අමෙරිකානු කොන්සල් කාර්යාලය ඉලක්ක කර ගනිමින් ඊයේ (අඟහරුවාදා) අලුයම එල්ල වූ වෙඩි ප්රහාරය සම්බන්ධයෙන් කැනඩා බලධාරීන් පුළුල් විමර්ශනයක් ආරම්භ කර තිබේ. කැනඩා රජය මෙම සිදුවීම “කිසිසේත්ම පිළිගත නොහැකි” (Absolutely unacceptable) ක්රියාවක් ලෙස හෙළා දැක ඇති අතර, රාජ්ය තාන්ත්රික ගොඩනැගිල්ලක ආරක්ෂාව තහවුරු කිරීම සඳහා උපරිම පියවර ගන්නා බව අවධාරණය කළේය. වාසනාවකට මෙන්, අලුයම කාලයේ මෙම ප්රහාරය සිදුවීම නිසා කිසිදු පුද්ගලයෙකුට තුවාල සිදුවී නොමැත.
ටොරොන්ටෝ පොලිස් සේවය (TPS) විසින් නිකුත් කරන ලද තොරතුරු වලට අනුව, සැකකරුවන් දෙදෙනෙකු සුදු පැහැති ‘හොන්ඩා CR-V’ වර්ගයේ රථයකින් අලුයම 4:30ට පමණ කොන්සල් කාර්යාලය අසලට පැමිණ ඇත. ඔවුන් වාහනයෙන් බැස අත් තුවක්කුවකින් ගොඩනැගිල්ල දෙසට වෙඩි කිහිපයක් එල්ල කර වහාම පලා ගොස් තිබේ. ගොඩනැගිල්ලේ ප්රධාන පිවිසුමේ වීදුරු දොරෙහි වෙඩි සලකුණු අවම වශයෙන් දෙකක්වත් පවතින බව රූපවාහිනී දර්ශන මගින් තහවුරු විය. පොලිස් අධිකරණ වෛද්ය කණ්ඩායම් සහ ආරක්ෂක අංශ මේ වන විට ප්රදේශයේ ආරක්ෂාව දැඩි කර ඇති අතර, සීසීටීවී (CCTV) දර්ශන ඔස්සේ සැකකරුවන් හඳුනා ගැනීමට කටයුතු කරමින් සිටියි.
