අමෙරිකානු ජනාධිපති ඩොනල්ඩ් ට්රම්ප් අද (මාර්තු 11) විශේෂ ප්රකාශයක් කරමින් කියා සිටියේ වසර 47ක ඉරාන පාලනයේ ‘ත්රස්තවාදී’ ක්රියාකාරකම් සහ ඔවුන්ගේ ප්රොක්සි (Proxy) කණ්ඩායම් මුළුමනින්ම මර්දනය කර ලොවට සාමය උදා කරන බවයි. ඒබ්රහම් ලින්කන්ගේ ඓතිහාසික ප්රකාශයන් සිහිගන්වමින් ඔහු අවධාරණය කළේ ඉරානයේ න්යෂ්ටික අභිලාෂයන් සහ හෝර්මුස් සමුද්ර සන්ධියේ (Strait of Hormuz) නාවික බාධාවන් අවසන් කිරීමට අමෙරිකාව සූදානම් බවයි. ට්රම්ප්ගේ ප්රකාශයේ අඩංගු ප්රධාන කරුණු කිහිපයක් මෙසේය:
සමුද්ර සන්ධියේ ආරක්ෂාව: හෝර්මුස් සමුද්ර සන්ධිය හරහා නිදහස් නාවික ගමනාගමනය තහවුරු කරන බවත් ඉරානය විසින් මුහුදු බෝම්බ ඇටවීමට උත්සාහ කළහොත් මෙතෙක් නොදුටු මට්ටමේ දැවැන්ත මිලිටරි ප්රතිචාරයක් ලබා දෙන බවත් ඔහු අනතුරු ඇඟවීය.
තෙල් මිල පාලනය: ගෝලීය බලශක්ති මිල ස්ථාවර කිරීම සඳහා අමෙරිකාවේ උපායමාර්ගික තෙල් සංචිත (Strategic Petroleum Reserves) නිදහස් කිරීමටත් තෙල් ටැංකි සඳහා දේශපාලන අවදානම් රක්ෂණ ලබා දීමටත් පියවර ගන්නා බව ඔහු පැවසීය. මේ හරහා අමෙරිකානු පවුල්වලට සහ ලෝකයට සහනදායී මිලට ඉන්ධන ලබා දීම ඔහුගේ අරමුණයි.
තාක්ෂණික ප්රහාර: ඉරාන පාලනයට සම්බන්ධ බෝම්බ තැන්පත් කරන නාවික යාත්රා විනාශ කිරීම සඳහා අමෙරිකාව සතු නවීනතම මිසයිල තාක්ෂණය දැනටමත් භාවිත කරමින් සිටින බව ඔහු හෙළි කළේය.
ධවල මන්දිරය මගින් නිකුත් කරන ලද මෙම ප්රකාශයත් සමඟ මැදපෙරදිග කලාපයේ පවතින යුදමය වාතාවරණය තවදුරටත් උණුසුම් වී ඇති අතර ඉරානය මෙයට ලබා දෙන ප්රතිචාරය පිළිබඳව මුළු ලොවම අවධානයෙන් පසුවේ.
