රුසියාව සහ යුක්රේනය අතර පවතින ගැටුම් වසර හතරකට වඩා වැඩි කාලයක් පුරා ඇදී යමින් පවතින අතර, අද (මාර්තු 11) දෙපාර්ශ්වයම හුවමාරු කරගත් මාරාන්තික ඩ්රෝන ප්රහාර හේතුවෙන් පුද්ගලයින් සිව්දෙනෙකු ජීවිතක්ෂයට පත්ව තිබේ. කිසිදු රාජ්ය තාන්ත්රික විසඳුමක සේයාවක් පෙනෙන තෙක් මානයක නොමැති පසුබිමක මෙම ප්රහාර වාර්තා වී ඇත.
යුක්රේනයේ දෙවන විශාලතම නගරය වන කාර්කිව් (Kharkiv) ඉලක්ක කර රුසියාව එල්ල කළ ප්රහාරවලින් දෙදෙනෙකු මියගොස් තවත් හත්දෙනෙකු තුවාල ලබා තිබේ. කාර්කිව්හි ෂෙව්චෙන්කිව්ස්කි (Shevchenkivsky) දිස්ත්රික්කයේ පිහිටි සිවිල් ව්යවසාය ආයතනයකට මෙම ප්රහාරය එල්ල වී ඇති අතර, ඉන් හටගත් ගින්නෙන් තුවාල ලැබූ තිදෙනෙකු සහ පිරිමින් සිව්දෙනෙකු රෝහල්ගත කර ඇති බව ආණ්ඩුකාර ඔලෙග් සිනෙගුබොව් (Oleg Synegubov) මහතා තහවුරු කළේය.
මීට අමතරව, රුසියාව විසින් මැදපෙරදිග පවතින යුද තත්ත්වය සඳහා ඉරානයට සහය දක්වමින් අමෙරිකානු ඉලක්ක පිළිබඳ බුද්ධි තොරතුරු ලබා දී ඇති බවට ද වාර්තා පළ වෙමින් පවතින අතර, එය රුසියාව මැදපෙරදිග යුද්ධයට සෘජුව හෝ වක්රව සම්බන්ධ වීමේ පළමු ලකුණ ලෙස විචාරකයෝ හඳුන්වති. යුක්රේන දේශසීමාව ආසන්නයේ පිහිටි නගර දිනපතාම පාහේ මෙලෙස රුසියානු මිසයිල සහ ඩ්රෝන ප්රහාරවලට ලක්වෙමින් පවතී.
