ඉරානයේ නව නායක 56 හැවිරිදි මොජ්තාබා ඛමේනි මහතා මෑතකදී එල්ල වූ ප්රහාර හමුවේ තුවාල ලබා ඇති බවට පැතිර යන වාර්තා රජයේ උපදේශක යූසෙෆ් පෙසෙෂ්කියන් (Yousef Pezeshkian) මහතා විසින් ප්රතික්ෂේප කර තිබේ. ඉරාන ජනාධිපති මසූඩ් පෙසෙෂ්කියන්ගේ පුත්රයා වන යූසෙෆ් සිය ටෙලිග්රෑම් නාලිකාව ඔස්සේ පණිවුඩයක් නිකුත් කරමින් සඳහන් කර ඇත්තේ, තමන් අදාළ පාර්ශ්වයන්ගෙන් කළ විමසීමකදී නව නායකයා නිරෝගීව සහ ආරක්ෂිතව පසුවන බව තහවුරු වූ බවයි.
කෙසේ වෙතත්, ඉරාන රාජ්ය රූපවාහිනිය මීට පෙර මොජ්තාබා ඛමේනිව හඳුන්වා දී තිබුණේ “රමසාන් යුද්ධයේදී තුවාල ලැබූ ප්රවීණයෙකු” ලෙස වුවද, එම තුවාලවල ස්වභාවය පිළිබඳව නිශ්චිත විස්තරයක් අනාවරණය කර නොතිබුණි. සිය පියා වන අලි ඛමේනිගෙන් පසුව මීට දින තුනකට පෙර නායකත්වයට පත් වූ මොජ්තාබාගේ සෞඛ්ය තත්ත්වය සහ ඔහු සිටින ස්ථානය පිළිබඳව මේ වන විට ජාත්යන්තරය තුළ දැඩි කතාබහක් නිර්මාණය වී තිබේ.
නිව් යෝර්ක් ටයිම්ස් පුවත්පත වාර්තා කර තිබුණේ ඇමෙරිකාව සහ ඊශ්රායලය විසින් ඉරානයට එල්ල කළ ප්රහාරවල පළමු දිනයේදී මොජ්තාබා ඛමේනි තුවාල ලැබූ බවයි. නිර්නාමික ඉරාන සහ ඊශ්රායල නිලධාරීන් උපුටා දක්වමින් එම පුවත්පත මෙම වාර්තාව පළ කර තිබූ අතර, රජයේ උපදේශකවරයාගේ මෙම නවතම ප්රකාශය එම වාර්තාවලට සෘජුවම අභියෝග කිරීමක් ලෙස සැලකේ.
