පර්සියානු ගල්ෆ් කලාපයේ අරාබි රාජ්යයන් ඉලක්ක කරගනිමින් ඉරානය දියත් කර ඇති ප්රහාර වහාම අත්හිටුවන ලෙස එක්සත් ජාතීන්ගේ ආරක්ෂක මණ්ඩලය බදාදා (11) විශේෂ යෝජනාවක් සම්මත කරමින් ඉල්ලා සිටියේය. බහරේනය විසින් ඉදිරිපත් කරන ලද මෙම යෝජනාවට පක්ෂව රටවල් 13ක් ඡන්දය ප්රකාශ කළ අතර, රුසියාව සහ චීනය ඡන්දය දීමෙන් වැළකී සිටියහ. බහරේනය, කුවේටය, ඕමානය, කටාර්, සෞදි අරාබිය, එක්සත් අරාබි එමීර් රාජ්යය සහ ජෝර්දානය යන රටවලට එල්ල වන ප්රහාර මෙන්ම හෝමූස් සමුද්ර සන්ධියේ නාවික ගමනාගමනයට බාධා කිරීම ද මෙමගින් දැඩි ලෙස හෙළා දැක තිබේ.
අමෙරිකානු සහ ඊශ්රායල ප්රහාර හමුවේ ඉරානයේ උත්තරීතර නායක අයතුල්ලා අලි කමේනි ජීවිතක්ෂයට පත්වීමෙන් පසු, ඉරානය සිය අසල්වැසි රටවලට සහ ජාත්යන්තර වෙළඳ නැව්වලට දිගින් දිගටම ප්රහාර එල්ල කරමින් සිටී. මෙම තත්ත්වය ගෝලීය බලශක්ති ආරක්ෂාවට සහ ආර්ථික ස්ථාවරත්වයට බරපතල තර්ජනයක් බව බහරේන තානාපති ජමාල් ෆාරෙස් අල්රොවෙයි (Jamal Fares Alrowaiei) අවධාරණය කළේය. කෙසේ වෙතත්, අමෙරිකාව සහ ඊශ්රායලය ඉරානයට එල්ල කරන ප්රහාර පිළිබඳව මෙම යෝජනාවේ සඳහන් නොවීම නිසා රුසියාව සහ චීනය සිය අප්රසාදය පළ කළහ.
ඉරාන තානාපති අමීර් සෙයිඩ් ඉරවානි (Amir Saeid Iravani) මෙම තීරණය හැඳින්වූයේ අමෙරිකාවේ සහ ඊශ්රායලයේ දේශපාලන අවශ්යතා වෙනුවෙන් ආරක්ෂක මණ්ඩලය අවභාවිත කිරීමක් ලෙසයි. සිය රට ආක්රමණයක ගොදුරක් බවට පත්ව ඇති මොහොතක මෙවැනි ඒකපාර්ශ්වික යෝජනා සම්මත කිරීම අසාධාරණ බව ඔහු පැවසීය. අමෙරිකානු තානාපති මයික් වෝල්ට්ස් (Mike Waltz) සඳහන් කළේ අසල්වැසි රටවල් ප්රාණඇපකරුවන් ලෙස තබා ගනිමින් ඉරානය ගෙන යන උපායමාර්ගය ලෝකයම හෙළා දැක ඇති බවයි.
