මෙරට පොදු ප්රවාහන පද්ධතිය තුළ ආබාධ සහිත තැනැත්තන්ගේ ගමනාගමන අයිතිය තහවුරු කිරීම වෙනුවෙන් විශේෂිත ප්රමුඛතා බස් රථ සේවාවක් ලබන අප්රේල් මාසයේ සිට ආරම්භ කිරීමට ප්රවාහන, මහාමාර්ග සහ නාගරික සංවර්ධන අමාත්යාංශය පියවර ගෙන තිබේ. “සැමට සම අවස්ථා සහ මානව ගරුත්වය සුරක්ෂිත කරන රටක්” යන රජයේ ප්රතිපත්තියට අනුව ක්රියාත්මක වන මෙම ව්යාපෘතිය සඳහා රුපියල් මිලියන 430.7ක ප්රතිපාදන වෙන් කර ඇත.
ව්යාපෘතියේ පළමු අදියර සඳහා රෝද පුටු භාවිත කරන්නන්ට පහසුවෙන් ප්රවේශ විය හැකි, පතුල පහළ (Low floor) නවීන වායු සමනය කළ බස් රථ 10ක් පසුගිය 10 වනදා හම්බන්තොට වරාය වෙත ගෙන එනු ලැබීය. මෙම බස් රථ ලබන සෙනසුරාදා මෙට්රෝ සමාගම වෙත නිල වශයෙන් භාර දීමට නියමිතය. එක් බස් රථයක ආසන 33ක් පවතින අතර, මගීන් 80 දෙනෙකුට එකවර ගමන් කළ හැකිය. රෝද පුටු භාවිත කරන්නන්ගේ ආරක්ෂාව වෙනුවෙන් විශේෂිත තාක්ෂණික අංගයන්ගෙන් ද මෙම රථ සමන්විත වේ.
නියමු ව්යාපෘතියක් ලෙස මාකුඹුර බහුවිධ ප්රවාහන මධ්යස්ථානය කේන්ද්ර කර ගනිමින් මෙම සේවාව ආරම්භ කෙරේ. ඒ අනුව මාකුඹුර සිට පිටකොටුව දක්වාත්, මාකුඹුර සිට කඩවත දක්වාත් සෑම විනාඩි 40කට වරක් මෙම බස් රථ ධාවනය කිරීමට සැලසුම් කර ඇත. මහරගම අපේක්ෂා රෝහල සහ කොළඹ ජාතික රෝහල යන ප්රධාන සෞඛ්ය මධ්යස්ථාන ආවරණය වන පරිදි මෙම ධාවන කටයුතු සිදු කෙරෙන බව ජනාධිපති මාධ්ය අංශය සඳහන් කරයි.
මෙම සේවාව සඳහා තෝරාගත් රියදුරන් සහ කොන්දොස්තරවරුන් 28 දෙනෙකු සඳහා විශේෂ පුහුණුවක් ලබා දීමට නියමිත අතර, ඊට සංඥා භාෂාව සහ මගී සත්කාර පිළිබඳ පුහුණුව ද ඇතුළත් වේ. මෙම ව්යාපෘතියේ සාර්ථකත්වය මත පදනම්ව ලබන අගෝස්තු මාසයේදී තවත් මෙවැනි බස් රථ 100ක් ගෙන්වීමට රජය අපේක්ෂා කරයි. මීට සමගාමීව “ක්ලීන් ශ්රී ලංකා” වැඩසටහන යටතේ බස් නැවතුම්පොළවල් ද ආබාධ සහිත පුද්ගලයින්ට හිතකර ලෙස ප්රතිසංස්කරණය කිරීමට පියවර ගැනේ.
