ජනාධිපතිවරයෙකු යනු පැය විසිහතරේම සහ වසරේ දින 365 පුරාම එම ධුරය දරන තැනැත්තා බැවින්, ඔහුගේ කාර්යභාරය නිල හෝ පෞද්ගලික වශයෙන් වෙන් කළ නොහැකි බව හිටපු අමාත්ය මහාචාර්ය ජී.එල්. පීරිස් මහතා අවධාරණය කරයි. කොළඹ පැවැති මාධ්ය සාකච්ඡාවකට එක්වෙමින් ඔහු පෙන්වා දුන්නේ ජනාධිපතිවරයෙකුගේ නිල සහ පෞද්ගලික චාරිකා පිළිබඳව වර්තමානයේ සමාජය තුළ පවතින කතිකාව පදනම් විරහිත මෙන්ම මිථ්යාවක් බවයි.
ජනාධිපතිවරයෙකු දිවුරුම් දුන් මොහොතේ සිට එම ධුරය හොබවන තාක් ඔහු කොහේ සිටියත්, කුමන කාර්යයක නිරත වුවත් ආරක්ෂාව ඇතුළු සියලු පහසුකම් සැපයීමට රාජ්යය බැඳී සිටින බව මහාචාර්යවරයා ප්රකාශ කළේය. අමෙරිකානු ජනාධිපති ඩොනල්ඩ් ට්රම්ප් මහතා ගොල්ෆ් ක්රීඩාවේ නිරත වීමට ස්කොට්ලන්තයට යන අවස්ථාවකදී පවා ඔහුට ලබා දෙන ආරක්ෂාව අහිමි නොවන බව උදාහරණයක් ලෙස දක්වමින් ඔහු කියා සිටියේ, ජනාධිපතිවරයා මුහුදු වෙරළේ ව්යායාම කළත්, පෝය දිනක සිල් ගත්තත් හෝ පෞද්ගලික සාදයකට සහභාගී වුවත් ඔහු ජනාධිපතිවරයා ලෙසම සැලකෙන බවයි.
ආරක්ෂාව සමඟ බද්ධ වී පවතින ගමනාගමන සහ නවාතැන් පහසුකම් ද ජනාධිපතිවරයා වෙත අනිවාර්යයෙන්ම හිමි විය යුතු බවත්, ඔහු ඕනෑම ස්ථානයකට යන්නේ ජනාධිපතිවරයා ලෙස මිස පෞද්ගලික පුරවැසියෙකු ලෙස නොවන බවත් හිටපු අමාත්යවරයා වැඩිදුරටත් පැවසීය. ජාත්යන්තර නීතිය සහ සම්ප්රදායන්ට අනුව එවැනි විභේදනයක් නොමැති බවත්, පවතින අනවශ්ය ව්යාකූලත්වය ඉවත් කර තාර්කික පදනමක් මත මේ පිළිබඳව සාකච්ඡා කළ යුතු බවත් ඔහු මෙහිදී අවධාරණය කළේය.
