වසර 2024 දී ඇති වූ දරුණු දේශපාලන කැරලිවලින් අනතුරුව පැවැති තීරණාත්මක මැතිවරණයෙන් පසු, බංග්ලාදේශ පාර්ලිමේන්තුව අද (12) ප්රථම වරට රැස් විය. නව අග්රාමාත්ය ලෙස තේරී පත් වූ බංග්ලාදේශ ජාතික පක්ෂයේ (BNP) නායක තාරික් රහ්මාන් මහතා පාර්ලිමේන්තුව අමතමින් කියා සිටියේ, දශක එකහමාරකට අධික කාලයක් පැවැති මර්දනකාරී පාලනය අවසන් කර ජනතා නියෝජිතයන් සමඟ පාර්ලිමේන්තු කටයුතු යළි ආරම්භ කරන බවයි.
පසුගිය අගෝස්තු මාසයේදී හිටපු අගමැතිනී ෂෙයික් හසීනා බලයෙන් පහ කිරීමෙන් පසු එරට පාලනය කළ අන්තර්කාලීන පාලන අධිකාරියෙන් බලය ලබාගත් රහ්මාන් මහතා, රට පීඩාවට පත් කර ඇති අර්බුද විසඳීම සඳහා සියලු දේශපාලන පක්ෂ එක්ව කටයුතු කළ යුතු බව අවධාරණය කළේය. හිටපු පාලනය විසින් පාර්ලිමේන්තුව අක්රීය කර තිබූ බවට චෝදනා කළ ඔහු, සිය පාලනය යටතේ පාර්ලිමේන්තුව සියලු ජාතික ගැටලු සාකච්ඡා කරන මධ්යස්ථානය බවට පත් කරන බවට ප්රතිඥා දුන්නේය.
දැනට ඉන්දියාවේ රැකවරණය ලබා සිටින ෂෙයික් හසීනා මහත්මියට එරෙහිව බංග්ලාදේශ අධිකරණය විසින් මරණ දඬුවම නියම කර ඇත්තේ විරෝධතා මර්දනය කරමින් පුද්ගලයන් සිය ගණනක් ඝාතනය කිරීමේ චෝදනාව මතය. එක්සත් ජාතීන්ගේ සංවිධානයට අනුව එම කැරලිවලදී පුද්ගලයන් 1,400ක් පමණ මියගොස් 20,000කට අධික පිරිසක් තුවාල ලබා ඇත.
මැදපෙරදිග කලාපයේ පවතින යුදමය වාතාවරණය හමුවේ ඉන්ධන මිල ඉහළ යාම බංග්ලාදේශ ආර්ථිකයට ද දැඩි ලෙස බලපා තිබේ. මේ හේතුවෙන් එරට විශ්වවිද්යාල වසා දැමීමටත්, ඉන්ධන සලාක ක්රමයකට ලබා දීමටත් පියවර ගෙන ඇත. නව කථානායක ලෙස හෆීස් උද්දීන් අහමඩ් මහතා සහ නියෝජ්ය කථානායක ලෙස කයිසර් කමල් මහතා තේරී පත් වූ අතර, විරුද්ධ පක්ෂ නායක ලෙස ජමාත්-ඉ-ඉස්ලාමි පක්ෂයේ ෂෆීකූර් රහ්මාන් මහතා කටයුතු කරනු ඇත.
