ගාල්ල කරාපිටිය ශික්ෂණ රෝහලේ විදුලි සෝපානයක් අද (12) දහවල් හදිසියේ අක්රීය වීම හේතුවෙන් ඒ තුළ පුද්ගලයින් 15 දෙනෙකු පමණ සිරවී තිබේ. රෝහලේ බාහිර රෝගී අංශයේ ලියාපදිංචි කිරීම් සිදු කරන ස්ථානයේ පිහිටි මෙම විදුලි සෝපානය, රෝගීන් ඇතුළු පිරිසක් රැගෙන ඉහළ මාලයට ගමන් කිරීමට සූදානම් වූ අවස්ථාවේදී මෙලෙස අක්රීය වී ඇත.
විදුලි සෝපානයේ දොරවල් වැසී එය ක්රියා විරහිත වීමත් සමඟ ඇතුළත සිටි පිරිස කලබලයට පත්ව ඇති අතර, වහාම ක්රියාත්මක වූ රෝහල් ආරක්ෂක අංශ නිලධාරීන් සෝපානයේ අගුලු කඩා දොරවල් විවෘත කිරීමට පියවර ගෙන තිබේ. ආරක්ෂක අංශවල මැදිහත් වීමෙන් සෝපානය තුළ සිරවී සිටි පිරිස නිරුපද්රිතව පිටතට ගැනීමට හැකි වූ බව රෝහල් පොලිසිය සඳහන් කරයි.
රෝහල් වැනි අත්යවශ්ය සේවා සපයන ස්ථානයක මෙවැනි යාන්ත්රික දෝෂ ඇති වීම රෝගී සත්කාරක සේවාවලට දැඩි බාධාවක් වන අතර, මේ පිළිබඳව වැඩිදුර විමර්ශන ක්රියාත්මකය.
