සිසුසැරිය පාසල් බස් රථ සේවාව තවදුරටත් පුළුල් කරමින් 2026 වසරේදී අලුතෙන් බස් රථ 200කට අධික ප්රමාණයක් එක් කිරීමට රජය තීරණය කර තිබේ. අධ්යාපන සහ උසස් අධ්යාපන අමාත්ය වෛද්ය මධුර සෙනෙවිරත්න මහතා අද (12) දින ඉසුරුපාය පරිශ්රයේ පැවැති මාධ්ය හමුවකදී මේ බව ප්රකාශ කළේය. පාසල් දරුවන්ගේ ප්රවාහන පහසුකම් විධිමත් කිරීම වෙනුවෙන් මෙවර රුපියල් බිලියනයක මුදලක් රජය විසින් වෙන් කර ඇත.
මෙම වැඩපිළිවෙළ යටතේ සිසුන් ආරක්ෂිතව පාසල් වෙත ප්රවාහනය කිරීම ප්රමුඛතාවක් ලෙස සලකන බවත්, දරුවන්ට මානසික පීඩාවකින් තොරව ඉගෙනුම් කටයුතු සඳහා පාසලට පැමිණීමට අවශ්ය පරිසරය සකස් කිරීම මෙහි අරමුණ බවත් අමාත්යවරයා අවධාරණය කළේය. මේ සඳහා ප්රවාහන අමාත්යාංශය සහ ජාතික ගමනාගමන කොමිෂන් සභාව ඒකාබද්ධව කටයුතු කරනු ලබයි.
මෙහිදී අදහස් දැක්වූ ජාතික ගමනාගමන කොමිෂන් සභාවේ නිලධාරීන් පෙන්වා දුන්නේ පෞද්ගලික පාසල් ප්රවාහන සේවා නිසි ලෙස ප්රමිතිගත කිරීමට නීතිමය පියවර ගනිමින් සිටින බවයි. ඒ අනුව රථවාහනවල ප්රමිතිය, රියදුරන්ගේ පළපුරුද්ද සහ රිය සහායකයන් පිළිබඳ තොරතුරු ඇතුළත් නීතිමය කෙටුම්පත් සකස් කෙරෙමින් පවතී. සිසුසැරිය සේවාව තවදුරටත් ව්යාප්ත කිරීම සඳහා පෞද්ගලික බස් රථ සහ කුඩා වාහන හිමියන්ට ද ආරාධනා කර ඇති අතර, ප්රවාහන අපහසුතා ඇති සිසුන් සිටී නම් විදුහල්පතිවරුන් මාර්ගයෙන් ඒ පිළිබඳව දැනුම් දිය හැකිය.
