පේරාදෙණිය විශ්වවිද්යාල පරිශ්රය තුළ ශ්රී ලංකා කොටි (Sri Lankan Leopards) සැරිසරන බවට වාර්තා වීමත් සමඟ සිසුන්, කාර්ය මණ්ඩලය සහ ප්රදේශවාසීන්ට දැඩි විමසිල්ලෙන් පසුවන ලෙස විශ්වවිද්යාල බලධාරීන් දැනුම් දී තිබේ. හන්තාන ප්රදේශයට මායිම්ව පිහිටි පශු වෛද්ය ශික්ෂණ ගොවිපළ සහ කාර්ය මණ්ඩල සංවර්ධන මධ්යස්ථානය අවට ප්රදේශවල මෙම සතුන් නිතර ගැවසෙන බව හඳුනාගෙන ඇත.
වනජීවී සංරක්ෂණ දෙපාර්තමේන්තුවේ සහාය ඇතිව සිදුකළ පර්යේෂණවලට අනුව, පැටවෙකු සහිත මව් කොටියෙකු ඇතුළුව කොටි අට දෙනෙකු පමණ මෙම කලාපයේ ජීවත් වන බව අනාවරණය වී තිබේ. පැටවුන් සිටින මව් සතුන් ආහාර සොයා මිනිස් ජනාවාස වෙත පැමිණීමේ ප්රවණතාවක් පවතින අතර, පසුගිය දිනවල විශ්වවිද්යාල ගොවිපළේ සිටි එළදෙනෙකු සහ බල්ලෙකු කොටින්ගේ ප්රහාරයට ලක්ව මියගොස් ඇති බව ද වාර්තා වේ.
ගොවිපළේ සතුන් ආරක්ෂා කිරීම සඳහා ආරක්ෂිත වැටවල් ඉදිකිරීම සහ චලන සංවේදක (Motion Sensors) සහිත සීරූම් පද්ධති සවිකිරීමට පියවර ගෙන ඇත. විශ්වවිද්යාල ප්රජාවට දැනුම් දී ඇත්තේ විශේෂයෙන්ම අලුයම, සවස් කාලයේ සහ රාත්රී කාලයේ තනිව ගමන් කිරීමෙන් වළකින ලෙසයි. යම් හෙයකින් කොටියෙකු නෙත ගැටුණහොත් ඒ පිළිබඳව වහාම විශ්වවිද්යාල ආරක්ෂක අංශ වෙත දැනුම් දෙන ලෙස ද ඉල්ලා සිටියි.
