ඉරානය සමඟ පවතින යුද ගැටුම්වල පළමු දින හය තුළ පමණක් ඇමෙරිකානු එක්සත් ජනපදය අවම වශයෙන් ඇමෙරිකානු ඩොලර් බිලියන 11කට (රුපියල් බිලියන 3,300කට අධික) වඩා වැඩි මුදලක් වැය කර ඇති බව මූලික ඇස්තමේන්තු මගින් අනාවරණය වී තිබේ. ආරක්ෂක විසර්ජන කටයුතු පිළිබඳ අනුකමිටුවේ ප්රධාන සෙනෙට් සභිකයෙකු වන ක්රිස් කූන්ස් මහතා මෙම තොරතුරු තහවුරු කර ඇති අතර, පෙන්ටගනය විසින් කොන්ග්රස් මණ්ඩල සභිකයින් සමඟ පැවැත්වූ රහසිගත සාකච්ඡාවකදී ද මේ බව අනාවරණය කර ඇත.
පිරිවැය ඇස්තමේන්තුවලට අනුව වඩාත් නිවැරදි අගය ඩොලර් බිලියන 11.3ක් ලෙස දැක්වෙන අතර, යුද්ධයේ මුල් දින දෙක තුළ පමණක් ඇමෙරිකානු හමුදාව ඩොලර් බිලියන 5කට වඩා වටිනා පතොරම් සහ අවි ආයුධ භාවිතා කර තිබීම විශේෂත්වයකි. මෙම දැවැන්ත පිරිවැයට ප්රධාන වශයෙන් හේතු වී ඇත්තේ ඉරානයට එරෙහිව එල්ල කරන ලද අධි-තාක්ෂණික මිසයිල ප්රහාර, ගුවන් මෙහෙයුම් සහ කලාපය තුළ ස්ථානගත කර ඇති යුද නෞකා නඩත්තු කිරීම සඳහා වැයවන අධික පිරිවැයයි.
ගෝලීය තෙල් මිල ඉහළ යාම සහ සැපයුම් දාම බාධාවන් මධ්යයේ මෙවැනි දැවැන්ත යුද වියදමක් දැරීමට සිදුවීම ඇමෙරිකානු ආර්ථිකයට මෙන්ම ලෝක ආර්ථිකයට ද දැඩි බලපෑමක් එල්ල කළ හැකි බව ආර්ථික විශ්ලේෂකයෝ පෙන්වා දෙති. මෙම තත්ත්වය හමුවේ ඉදිරි මෙහෙයුම් සඳහා අතිරේක ප්රතිපාදන වෙන් කරවා ගැනීමට පෙන්ටගනයට සිදු වනු ඇතැයි ද වාර්තා වේ.
