ශ්රී ලංකාවට දකුණු දෙසින් වූ ගැඹුරු මුහුදේදී නාවික හමුදාව සහ පොලිසිය එක්ව සිදුකළ විශේෂ මෙහෙයුමකදී අත්අඩංගුවට ගත් මත්ද්රව්ය සහ ගිනි අවි තොගය පිටුපස සිටින ප්රධාන ජාවාරම්කරුවන් පිළිබඳ තොරතුරු අනාවරණය වී තිබේ. රුපියල් බිලියන 10කට අධික වටිනාකමකින් යුත් අයිස් සහ හෙරොයින් මත්ද්රව්ය කිලෝ 654ක් සමඟ සොයාගත් නවීන ගිනි අවි 11ක් මෙරටට එවා ඇත්තේ විදේශගතව සිටින ප්රබල මත්ද්රව්ය ජාවාරම්කරුවන් වන ‘පරවි සුදා’ සහ ‘අංගොඩ ප්රියංකර’ යන අය විසින් බවට පොලිසිය සැකකරයි.
මෙම ජාවාරමේ මෙහෙයුම් කටයුතු සිදුකර ඇත්තේ ‘හංසන’ නමැති බහුදින ධීවර යාත්රාව භාරව සිටි 23 හැවිරිදි ස්කීපර්වරයා විසින් බව විමර්ශනවලදී හෙළි වී ඇත. සැකකරුට ජාවාරම්කරුවන් විසින් මුදල් ලබාදී ඇති අතර, අදාළ ධීවර යාත්රාවල තිබී පිස්තෝල 08ක්, එම්. 16 වර්ගයේ ගිනි අවියක් සහ ටී-56 වර්ගයේ ගිනි අවි දෙකක් පොලිස් භාරයට ගැනුණි. පසුගිය 8 වැනිදා සිදුකළ මෙම වැටලීමේදී මුල් යාත්රාව සමඟ සැකකරුවන් 5 දෙනෙකු අත්අඩංගුවට ගත් අතර, පසුව ඊට ආධාර කළ තවත් බහුදින යාත්රාවක් සහ තවත් සැකකරුවන් පස්දෙනෙකු ද සිය භාරයට ගැනීමට නාවික හමුදාව සමත් විය.
සැකකරුවන් සහ ධීවර යාත්රා දෙක මේ වන විට දික්ඕවිට වරාය වෙත රැගෙන එනු ලැබ ඇති අතර, ඔවුන් අද (13) කොළඹ මහේස්ත්රාත් අධිකරණය වෙත ඉදිරිපත් කර රැඳවුම් නියෝග ලබා ගැනීමට නියමිතව ඇත. දකුණු මුහුදේ සිදුවන මෙම සංවිධානාත්මක අපරාධ මැඩලීම සඳහා ආරක්ෂක අංශ සිය මෙහෙයුම් තවදුරටත් පුළුල් කර තිබේ.
