ඉරානයේ ඉහළම ආරක්ෂක නිලධාරියෙකු වන අලි ලාරිජානි (Ali Larijani), ඇමෙරිකානු ජනාධිපති ඩොනල්ඩ් ට්රම්ප් වෙත දැඩි අනතුරු ඇඟවීමක් කරමින් ප්රකාශ කර ඇත්තේ ඉරානය සමඟ යුද්ධයක් ආරම්භ කිරීමේ ‘බරපතළ වැරදි ගණනය කිරීම’ වෙනුවෙන් ට්රම්ප්ට වන්දි ගෙවීමට සිදුවනු ඇති බවයි. ඊයේ (මාර්තු 12) ‘X’ (ට්විටර්) පණිවුඩයක් නිකුත් කරමින් ඔහු මේ බව සඳහන් කළේය.
ඉරානය සමඟ පවතින යුද්ධය බොහෝ දුරට අවසන් බවට ට්රම්ප් කළ ප්රකාශවලට ප්රතිචාර දක්වමින් ලාරිජානි කියා සිටියේ, යුද්ධයක් ආරම්භ කිරීම පහසු වුවද එය හුදෙක් ට්විටර් පණිවුඩ කිහිපයකින් ජයගත නොහැකි බවයි. ඇමෙරිකානු ජනාධිපතිවරයා සිය ක්රියාව ගැන පසුතැවෙන තුරු ඉරානය සිය ප්රහාර නතර නොකරන බව ඔහු අවධාරණය කළේය.
ට්රම්ප් ඉක්මන් ජයග්රහණයක් බලාපොරොත්තුවෙන් සිටියද, ඉරානය පරාජය කිරීම එතරම් පහසු නොවන බව පෙන්වා දුන් ලාරිජානි, #TrumpMustPay යන හැෂ්ටැගය (Hashtag) ද සිය සටහනට එක් කර තිබුණි. දෙරට අතර යුදමය තත්ත්වය තවදුරටත් උත්සන්න වෙමින් පවතින පසුබිමක ඉරාන නායකත්වයෙන් නිකුත් වූ මෙම ප්රකාශය ලෝක අවධානයට ලක්ව තිබේ.
