ඉරානය විසින් හෝර්මුස් සමුද්ර සන්ධිය යුද කලාපයක් බවට පත් කරමින් එල්ල කරන ප්රහාර හේතුවෙන් මේ වන විට නෞකා 19 කට හානි සිදුව ඇති අතර පුද්ගලයන් හත් දෙනෙකු ජීවිතක්ෂයට පත්ව තිබේ. පර්සියානු බොක්ක සහ ඕමාන් බොක්ක යා කරන මෙම තීරණාත්මක මුහුදු මාර්ගයේ පවතින්නේ අතිශය අවදානම් සහගත වාතාවරණයකි. විශේෂයෙන්ම බොරතෙල් ප්රවාහනය කරන නැව් සඳහා යුද නැව්වල ආරක්ෂාව ලබා දීමට පවා ඉරානය මෙතෙක් අවසර ලබා දී නොමැති බව වාර්තා වේ.
මෙවැනි දැඩි අවදානමක් මධ්යයේ ඉන්දීය නෞකා සංස්ථාවට (SCI) අයත් ‘Pushpak’ සහ ‘Piramal’ යන තෙල් ප්රවාහන නෞකා දෙක අද උදෑසන කිසිදු ආරක්ෂක බළකායක සහය නොමැතිව හෝර්මුස් සමුද්ර සන්ධිය සාර්ථකව තරණය කිරීමට සමත් විය. කෙසේ වෙතත් එම කාලය තුළදීම ඉරානය එල්ල කළ ප්රහාර හේතුවෙන් තවත් තෙල් නැව් තුනකට බරපතළ හානි සිදු වූ බව නාවික ක්ෂේත්රයේ නිල ආරංචි මාර්ග තහවුරු කරයි. ඉන්දියාවේ කන්ඩ්ලා වරාය බලා ගමන් කරමින් තිබූ තායිලන්තයට අයත් ‘Mayuree Naree’ නෞකාව ද මෙලෙස ප්රහාරයට ලක්ව ඇති අතර එහි බඳ කොටසට දැඩි හානි සිදුව තිබේ.
ලෝක බලශක්ති අර්බුදයක් නිර්මාණය කරමින් ඇමෙරිකාවට සහ ඉශ්රායලයට බලපෑම් කිරීම සඳහා ඉරානය හෝර්මුස් සමුද්ර සන්ධිය මෙලෙස අවහිර කර ඇති බව දේශපාලන විචාරකයෝ පවසති. මෙය එක්සත් ජාතීන්ගේ මුහුදු නීතිය පිළිබඳ සම්මුතිය (UNCLOS) සහ නිදහස් නාවික ගමනාගමන අයිතිය බරපතළ ලෙස උල්ලංඝනය කිරීමක් ලෙස සැලකේ. එමෙන්ම තමන්ගේ රට තුළ ඇමෙරිකානු හමුදා කඳවුරුවලට ඉඩ ලබා දුන් අනෙකුත් ගල්ෆ් කලාපීය රටවලට දඬුවම් කිරීමේ අරමුණින් ඉරානය මෙම ප්රහාර මෙහෙයවන බව පෙනී යයි.
