බ්රිතාන්යයේ කෙන්ට් (Kent) ප්රාන්තයේ කැන්ටබරි (Canterbury) ප්රදේශය කේන්ද්ර කරගනිමින් අසාමාන්ය වේගයකින් පැතිර යන ‘මෙනින්ජයිටිස් B’ (Meningitis B) රෝගී තත්ත්වය හේතුවෙන් විශ්වවිද්යාල සිසුවෙකු ඇතුළු දෙදෙනෙකු මියගොස් ඇති අතර තවත් සැකකටයුතු රෝගීන් 20 දෙනෙකු පමණ වාර්තා වී තිබේ. සාමාන්යයෙන් හුදකලා සිදුවීම් ලෙස වාර්තා වන මෙම රෝගය, මෙලෙස කෙටි කාලයක් තුළ ප්රජාවක් අතර “පුපුරණ සුලු” වේගයකින් පැතිර යාම සෞඛ්ය අංශවල දැඩි අවධානයට ලක්ව ඇත.
බාත් විශ්වවිද්යාලයේ (University of Bath) මහාචාර්ය ඇන්ඩෘ ප්රෙස්ටන් පවසන පරිදි, මෙම බැක්ටීරියාව සාමාන්යයෙන් පුද්ගලයෙකුගෙන් තවත් අයෙකුට බෝ වීමට සමීප සහ දීර්ඝ කාලීන සම්බන්ධතාවයක් අවශ්ය වුවද, මෙම අවස්ථාවේදී එය සිදුවී ඇති වේගය අදහාගත නොහැකි මට්ටමක පවතී. මීට පෙර 1980 දශකයේදී ග්ලොස්ටර්ෂයර් හි සිදුවූ ව්යාප්තියකදී රෝගීන් 65 දෙනෙකු වාර්තා වීමට වසර හතරහමාරක් ගත වුවද, මෙවර සතියක් වැනි කෙටි කාලයකදී රෝගීන් රැසක් වාර්තා වී තිබීම විශේෂත්වයකි.
මෙනින්ජයිටිස් B බැක්ටීරියාව සාමාන්යයෙන් බ්රිතාන්ය වැසියන්ගෙන් 10%කගේ පමණ නාසයේ සහ උගුරේ අහිතකර බලපෑමක් නොමැතිව ජීවත් වන අතර, තාරුණ්යයේ පසුවන්නන් අතර එය සිව්දෙනෙකුගෙන් එක් අයෙකුට (25%) පවතින බව සොයාගෙන ඇත. කලාතුරකින් මෙම බැක්ටීරියාව රුධිරයට හෝ මොළයට ඇතුළු වීමෙන් මෙනින්ජයිටිස් හෝ සෙප්සිස් (Sepsis) වැනි මාරාන්තික තත්ත්වයන් ඇති කරයි.
මෙම ව්යාප්තිය පාලනය කිරීම සඳහා කැන්ටබරි විශ්වවිද්යාල පරිශ්රයේ සිසුන් 5,000කට පමණ එන්නත් ලබාදීමේ දැවැන්ත වැඩපිළිවෙළක් මේ වන විට ආරම්භ කර ඇත. රෝග බිය හේතුවෙන් බොහෝ සිසුන් විශ්වවිද්යාල නේවාසිකාගාර අත්හැර සිය නිවෙස් බලා ගොස් ඇති බව ද වාර්තා වේ. මානව හැසිරීම්, පරිසරය හෝ බැක්ටීරියාවේ සිදුවූ යම් වෙනසක් මෙම වේගවත් ව්යාප්තියට හේතු වන්නට ඇතැයි විද්යාඥයෝ සැක කරති.
