ශ්රී ලංකාවට ආවේණික සහ ආරක්ෂිත ශාක විශේෂයක් වන ‘කොතලහිඹුටු’ කිලෝ ග්රෑම් 25ක ප්රමාණයක් නීති විරෝධී ලෙස මෙරටින් රැගෙන යාමට උත්සාහ කළ 37 හැවිරිදි චීන ජාතිකයෙකු කටුනායක බණ්ඩාරනායක ජාත්යන්තර ගුවන්තොටුපළේදී රේගු නිලධාරීන් විසින් අත්අඩංගුවට ගෙන තිබේ. චීන ඊස්ටර්න් ගුවන් සේවයට අයත් MU 6018 දරන ගුවන් යානයෙන් ෂැංහයි බලා පිටත්ව යාමට පැමිණ සිටි මොහු පරීක්ෂා කිරීමේදී මෙම තොගය සොයාගෙන ඇත.
මෙම කොතලහිඹුටු තොගය ඉතා සූක්ෂ්ම ලෙස තේ පැකට් ලෙස ඇසුරුම් කර ගමන් මලු තුළ සඟවා තිබූ බව රේගු නිලධාරීන් පවසයි. සත්ත්ව හා වෘක්ෂලතා ආරක්ෂක ආඥාපනත සහ රේගු ආඥාපනත යටතේ කොතලහිඹුටු වැනි ආරක්ෂිත ශාක විශේෂ රටින් බැහැර කිරීම සපුරා තහනම් වේ. අත්අඩංගුවට ගත් මෙම ශාක තොගයේ වටිනාකම රුපියල් ලක්ෂයක් පමණ වන බව ඇස්තමේන්තු කර ඇති අතර එය මේ වන විට රජයේ භාරයට ගෙන තිබේ.
ගුවන්තොටුපළ රේගු නිලධාරීන් සහ ජෛව විවිධත්ව, සංස්කෘතික හා ජාතික උරුමයන් සුරැකීමේ ඒකකය එක්ව මේ පිළිබඳව වැඩිදුර විමර්ශන පවත්වයි. වනජීවී ජාවාරම් සහ ජාත්යන්තර සම්මුතීන් උල්ලංඝනය කිරීම් සම්බන්ධයෙන් සැකකරුට එරෙහිව නීතිමය පියවර ගැනීමට නියමිතය.
