ප්රමිතියෙන් යුත් බඩඉරිඟු හිඟය හේතුවෙන් මාස කිහිපයක් තිස්සේ ඇනහිට තිබූ ත්රිපෝෂ නිෂ්පාදන කටයුතු මේ වන විට යළි ආරම්භ කර ඇති බව වාර්තා වේ. ප්රධාන අමුද්රව්ය සැපයුම බිඳවැටීම හේතුවෙන් මෙරට ඉලක්කගත ප්රතිලාභී කණ්ඩායම් වෙත ත්රිපෝෂ බෙදාහැරීමේ කටයුතු ද පසුගිය කාලසීමාව පුරා අක්රමවත් වී තිබුණි. වෙළෙඳ, වාණිජ, ආහාර සුරක්ෂිතතාව සහ සමුපකාර සංවර්ධන අමාත්ය වසන්ත සමරසිංහ මහතාගේ මැදිහත්වීම මත කැබිනට් අනුමැතිය ඇතිව ප්රමිතියෙන් යුත් බඩඉරිඟු ආනයනය කිරීම සඳහා ත්රිපෝෂ සමාගම සහ රජයේ වාණිජ විවිධ නීතිගත සංස්ථාව අතර අවබෝධතා ගිවිසුමකට එළඹීමත් සමඟ මෙම අර්බුදයට විසඳුම් ලැබී ඇත.
ත්රිපෝෂ සමාගමේ සභාපති අමල් අත්තනායක මහතා සඳහන් කළේ පවතින ඉල්ලුම සපුරාලීම සඳහා මේ වන විට පැය 24 පුරාම නිෂ්පාදන කටයුතු අඛණ්ඩව සිදු කෙරෙන බවයි. ඒ අනුව දිවයින පුරා පිහිටි සෞඛ්ය වෛද්ය නිලධාරී (MOH) කාර්යාල හරහා බෙදාහැරීමේ කටයුතු කඩිනම් කර ඇති අතර, සැපයුම් මග හැරුණු සියලු දෙනාට මෙම මාසය අවසන් වීමට පෙර ත්රිපෝෂ ලබාදීමට පියවර ගෙන තිබේ. ඉදිරි මාස කිහිපය තුළ ද ප්රමාණවත් තොග පවත්වා ගැනීමට අවශ්ය කටයුතු සලසා ඇති බව සභාපතිවරයා වැඩිදුරටත් අවධාරණය කළේය.
