බලශක්ති සුරක්ෂිතතාව තහවුරු කිරීමේ අරමුණින් සපුගස්කන්ද පිරිපහදුව පුළුල් කර දෙවන පිරිපහදුවක් ඉදිකිරීම සඳහා රුපියල් මිලියන 1,684.53ක දැවැන්ත මුදලක් වැය කර තිබුණද, එම ව්යාපෘතියේ මෙතෙක් කිසිදු භෞතික ප්රගතියක් දක්නට නොමැති බව විගණන වාර්තා මගින් අනාවරණය වී ඇත. ශක්යතා අධ්යයනයන් සහ ඉඩම් අත්පත් කර ගැනීම් වෙනුවෙන් මෙම මුදල වැය කර ඇති අතර, 2021 වර්ෂයේදී පමණක් ශක්යතා අධ්යයනය සඳහා රුපියල් මිලියන 171.39ක් වැය කර තිබේ. කෙසේ වෙතත්, අත්පත් කරගත් ඉඩම් පවා මේ දක්වා කිසිදු පලදායී ආර්ථික කටයුත්තකට යොදා නොගෙන නිෂ්කාර්යව පවතින බව විගණනයේදී හෙළි වී ඇත.
ශ්රී ලංකාවේ මුළු ආනයන වියදමෙන් 25.2%ක් හෙවත් ඩොලර් මිලියන 4,233ක් පමණ වාර්ෂිකව වැය වන්නේ බොරතෙල් සහ පිරිපහදු කළ තෙල් ආනයනය සඳහාය. දැනට පවතින සපුගස්කන්ද පිරිපහදුව මගින් දේශීය ඉල්ලුමෙන් සපුරාලනු ලබන්නේ 25%ක් පමණක් වන අතර ඉතිරි 75%ම ආනයනය කිරීමට සිදුව තිබේ. මේ සම්බන්ධයෙන් බලශක්ති අමාත්යාංශය පවසන්නේ වත්මන් රජය යටතේ දිනකට බැරල් 10,000ක ධාරිතාවයෙන් යුත් නව පිරිපහදුවක් ඉදිකිරීමට ජාත්යන්තර සමාගම්වලින් අභිලාෂයන් කැඳවා ඇති බවත්, ඒ සඳහා ලැබී ඇති යෝජනා 20ක් මේ වන විට ඇගයීමට ලක් කරමින් පවතින බවත්ය.
