ඉරාන බැලිස්ටික් මිසයිල ප්රහාරයෙන් දැඩි හානි සිදුවූ දකුණු ඊශ්රායලයේ අරද් (Arad) නගරයේ නිරීක්ෂණ චාරිකාවකට අද (22) එක්වෙමින් ඊශ්රායල අග්රාමාත්ය බෙන්ජමින් නෙතන්යාහු ප්රකාශ කළේ ඊශ්රායලය මේ වන විට සිදුකරන සටන සමස්ත ලෝකයේම ආරක්ෂාව වෙනුවෙන් සිදුකරන්නක් බවයි. ඊශ්රායල ගුවන් ආරක්ෂණ පද්ධති අභිබවා යමින් එල්ල වූ මෙම ප්රහාරයෙන් අරද් නගරයේ නේවාසික ගොඩනැගිලිවලට දැඩි හානි සිදුව ඇති අතර කුඩා දරුවන් 18 දෙනෙකු ඇතුළු පුද්ගලයින් 31 දෙනෙකු රෝහල්ගත කර තිබේ. ඉන් 9 දෙනෙකුගේ තත්ත්වය බරපතල බව වාර්තා වේ.
ප්රහාරය එල්ල වූ ස්ථානයේ සිට අදහස් දැක්වූ අග්රාමාත්යවරයා, කිසිදු ජීවිත හානියක් සිදු නොවීම පිළිබඳව සතුට පළ කළ අතර සිරේන් (Sirens) නාද වූ වහාම ආරක්ෂිත ස්ථාන කරා යොමු වීමේ වැදගත්කම අවධාරණය කළේය. “ඔබ ආරක්ෂිත ස්ථානවල සිටින්නේ නම් ඔබ සුරක්ෂිතයි” යනුවෙන් පැවසූ ඔහු, ඉරානයේ මෙම ආක්රමණශීලී ක්රියාවන්ට එරෙහිව ජාත්යන්තර ප්රජාව එක්විය යුතු බවට ද ඉල්ලීමක් කළේය. මෙම ප්රහාරයත් සමඟ මැදපෙරදිග කලාපයේ පවතින යුදමය වාතාවරණය තවදුරටත් උණුසුම් වී තිබේ.
