මැදපෙරදිග කලාපයේ පවතින උග්ර යුද වාතාවරණය හමුවේ ඇතිවිය හැකි ආහාර අර්බුදයට මුහුණ දීම සඳහා ගෙවතු මෙන්ම වගා කළ හැකි සෑම ස්ථානයකම එළවළු, පලතුරු සහ අල වර්ග වගා කරන ලෙස කෘෂිකර්ම දෙපාර්තමේන්තුව ජනතාවගෙන් විශේෂ ඉල්ලීමක් කරයි. කෘෂිකර්ම දෙපාර්තමේන්තුවේ අතිරේක අධ්යක්ෂ ජනරාල් ඩී.ජී.වී. ශ්යාමලී මහත්මිය පෙන්වා දෙන්නේ මේ සඳහා වන කඩිනම් ජාතික වැඩසටහනක් කෘෂිකර්ම අමාත්යාංශය හරහා දැනටමත් ක්රියාත්මක කර ඇති බවයි. මෙහිදී ජනතාවට අවශ්ය බීජ සහ පැළ වර්ග ග්රාමීය මට්ටමින් ලබාදීමට රජය පියවර ගෙන ඇති අතර, ඉදිරි යල කන්නය සඳහා අවශ්ය බීජ, පොහොර සහ අනෙකුත් කෘෂි යෙදවුම් ප්රමාණවත් පරිදි රට තුළ පවතින බවට ද ඇය සහතික විය.
ගන්නෝරුව ජාතික කෘෂිකර්ම හා තොරතුරු මධ්යස්ථානයේදී පැවැති මාධ්ය හමුවකට එක්වෙමින් අතිරේක අධ්යක්ෂ ජනරාල්වරිය සඳහන් කළේ, මහ කන්නයේ අස්වනු නෙළීම මේ වන විට ආරම්භ වී ඇති අතර ඇතැම් දිස්ත්රික්කවල යල කන්නයේ වගා කටයුතු ද ආරම්භ කර ඇති බවයි. මැදපෙරදිග යුද තත්ත්වය මෙරට කෘෂිකර්මාන්තයට සෘජු හානියක් සිදු නොවන පරිදි පවත්වාගෙන යාමට අවශ්ය තාක්ෂණික උපදෙස් ගොවීන් වෙත ලබාදීමේ වැඩසටහන් ද ග්රාමීය මට්ටමින් ක්රියාත්මක වේ. විශේෂයෙන් උඩරට එළවළු බීජ ආනයනය කළද, පහතරට එළවළු බීජ දේශීයව නිපදවා ගන්නා බැවින් සහ කෘෂිකර්ම දෙපාර්තමේන්තුව සතුව ප්රමාණවත් බීජ තොග පවතින බැවින් ඉදිරි කන්නයේදී බිත්තර වී හෝ එළවළු බීජ හිඟයක් ඇති නොවන බව ඇය වැඩිදුරටත් අවධාරණය කළාය.
