මැදපෙරදිග පවතින යුදමය වාතාවරණය හමුවේ ඇති වී තිබෙන ගෝලීය බලශක්ති අභියෝගයට මුහුණ දීම සඳහා රටේ බලශක්ති සුරක්ෂිතතාව පවත්වාගෙන යාමට ගත හැකි සියලු ක්රියාමාර්ග ගන්නා ලෙස ජනාධිපති අනුර කුමාර දිසානායක මහතා අද (23) නිලධාරීන්ට උපදෙස් දුන්නේය. විශේෂයෙන්ම දෛනික විදුලි පරිභෝජනය උපරිම වන පස්වරු 6.00 සිට රාත්රී 10.00 දක්වා කාලය තුළ විදුලිය අරපිරිමැස්මෙන් භාවිත කිරීම පිළිබඳව ජනතාව දැනුවත් කිරීමේ අවශ්යතාව ජනාධිපතිවරයා මෙහිදී අවධාරණය කළේය.
බලශක්ති කළමනාකරණය සඳහා රාජ්ය සේවාවට විශේෂ මාර්ගෝපදේශ ලබා දීම සහ පළාත් පාලන ආයතන මට්ටමින් පරිභෝජනය විධිමත් කිරීම කෙරෙහි මෙහිදී අවධානය යොමු විය. විශාල වශයෙන් විදුලිය වැය වන ප්රචාරක දැන්වීම් පුවරු සහ අලංකරණ විදුලි පද්ධති සඳහා විදුලිය භාවිතය සීමා කිරීමටත්, නාගරික ප්රදේශවල පවතින අත්යවශ්ය නොවන වීදි ලාම්පු නිවා දැමීම හෝ අවම කිරීමටත් ජනාධිපතිවරයා උපදෙස් ලබා දුන්නේය. එසේම ප්රවාහන හා මහාමාර්ග අමාත්යාංශය මගින් ඉදිරිපත් කළ බලශක්ති කළමනාකරණ යෝජනා පිළිබඳව ද මෙහිදී දීර්ඝ වශයෙන් සාකච්ඡා කෙරිණි.
මෙම අර්බුදය ජය ගැනීම සඳහා පුද්ගලික සහ ආයතනික මට්ටමින් සියලු දෙනාම වගකීමෙන් කටයුතු කළ යුතු බව ජනාධිපතිවරයා පෙන්වා දුන් අතර අමාත්යවරුන් වන චන්දන අබේරත්න, බිමල් රත්නායක, කුමාර ජයකොඩි ඇතුළු උසස් රාජ්ය නිලධාරීන් පිරිසක් මෙම සාකච්ඡාවට එක්ව සිටියහ.
