ඇමරිකානු රජයේ අරමුදල් අර්බුදයක් හේතුවෙන් ප්රවාහන ආරක්ෂක පරිපාලනයේ (TSA) නිලධාරීන්ට වැටුප් ගෙවීමට නොහැකි වීම නිසා ඇති වී තිබෙන දැවැන්ත සේවක හිඟයට විසඳුමක් ලෙස, ප්රධාන ගුවන්තොටුපළවල් වෙත ආගමන විගමන සහ රේගු බලාත්මක කිරීමේ (ICE) නිලධාරීන් යෙදවීමට ජනාධිපති ඩොනල්ඩ් ට්රම්ප් නියෝග කර තිබේ. TSA නිලධාරීන් සේවයට වාර්තා නොකිරීම නිසා නිව්යෝර්ක්, ඇට්ලන්ටා සහ හිවුස්ටන් වැනි ප්රධාන නගරවල ගුවන්තොටුපළවල ආරක්ෂක පරීක්ෂාවන් සඳහා පැය 3කට වඩා වැඩි කාලයක් පෝලිම්වල රැඳී සිටීමට මගීන්ට සිදුව ඇති අතර, එම තත්ත්වය පාලනය කිරීම සඳහා සිය ගණනක ICE නිලධාරීන් යෙදවීමට ස්වදේශ කටයුතු දෙපාර්තමේන්තුව (DHS) තීරණය කර ඇත.
නිල ලේඛනයක් මෙතෙක් ප්රකාශයට පත් කර නොමැති වුවද විදෙස් මාධ්ය වාර්තාවලට අනුව Newark Liberty, JFK, LaGuardia, Hartsfield-Jackson, Bush, Philadelphia, Chicago O’Hare, New Orleans සහ Phoenix යන ගුවන්තොටුපළවල් සඳහා මෙම නිලධාරීන් යෙදවීමට ප්රමුඛතාවය හිමි වනු ඇත. ජනාධිපති ට්රම්ප් සිය Truth Social ගිණුමේ සටහනක් තබමින් ප්රකාශ කර ඇත්තේ ICE නිලධාරීන් මෙම කාර්යය පෙරටත් වඩා හොඳින් ඉටු කරනු ඇති බවයි. කෙසේ වෙතත්, ගුවන් සේවා ආරක්ෂක අංශ පෙන්වා දෙන්නේ ICE නිලධාරීන් පුපුරණ ද්රව්ය සහ අවි ආයුධ හඳුනා ගැනීම පිළිබඳව TSA නිලධාරීන් මෙන් මාස ගණනාවක විශේෂ පුහුණුවක් ලබා නොමැති බැවින් මෙය අවදානම් සහගත පියවරක් විය හැකි බවයි.
