යෝජිත ස්වාධීන මාධ්ය කොමිෂන් සභාව පිහිටුවීම සඳහා සකස් කර ඇති මූලික සංකල්ප පත්රිකාව සම්බන්ධයෙන් ශ්රී ලංකා විද්යුත් විකාශකයින්ගේ සංගමය (SLBG) ජනමාධ්ය අමාත්ය වෛද්ය නලින්ද ජයතිස්ස මහතා වෙත සිය දැඩි කණස්සල්ල පළ කර තිබේ. රූපවාහිනී සහ ගුවන් විදුලි විකාශකයින් නියෝජනය කරන ප්රමුඛතම ආයතනය ලෙස මෙම ලේඛනය සකස් කිරීමේදී තමන්ගෙන් කිසිදු විමසීමක් කර නොමැති වීම පිළිබඳව එම සංගමයේ සභාපති අසංග ජයසූරිය සහ ලේකම් ලක්සිරි වික්රමගේ යන මහත්වරුන්ගේ අත්සනින් යුතු ලිපියක් මගින් අමාත්යවරයා දැනුවත් කර ඇත.
2025 ඔක්තෝබර් මාසයේදී ශ්රී ලංකා පුවත්පත් මණ්ඩලය යටතේ පත් කරන ලද විශේෂඥ කමිටුවක් මගින් මෙම සංකල්ප පත්රිකාව සකස් කර ඇති අතර, එයින් ගුවන් විදුලි, රූපවාහිනී, මුද්රිත සහ අන්තර්ජාල මාධ්ය ආවරණය වන පරිදි පුළුල් රාමුවක් යෝජනා කර තිබේ. විද්යුත් මාධ්ය ක්ෂේත්රයට සෘජුව බලපාන මෙවැනි වැදගත් ලේඛනයක් සකස් කිරීමේදී ක්ෂේත්රයේ ප්රවීණයන් සම්බන්ධ කර නොගැනීම හේතුවෙන් තාක්ෂණික, මෙහෙයුම් සහ ආර්ථික පැතිකඩයන් මෙන්ම බලපත්ර ලබාදීමේ ක්රියාවලීන් පිළිබඳ පවතින ප්රායෝගික ගැටලු මතු විය හැකි බව එම සංගමය පෙන්වා දෙයි.
පවතින තත්ත්වය සැලකිල්ලට ගනිමින් ඉදිරි නීති සම්පාදන ක්රියාවලීන් සඳහා විකාශකයින්ගේ සංගමයේ නියෝජිතයින් සෘජුව සම්බන්ධ කර ගන්නා ලෙසත්, විද්යුත් මාධ්ය කොටස්කරුවන් සමඟ විධිමත් උපදේශන ක්රියාවලියක් ආරම්භ කරන ලෙසත් ඔවුහු ඉල්ලා සිටිති. මාධ්ය ක්ෂේත්රය වඩාත් නිදහස් සහ වගකීම් සහගත ලෙස පවත්වාගෙන යාම සඳහා රජය ගන්නා උත්සාහයන්ට සහය වීමට තමන් සැමවිටම සූදානම් බවද එම සංගමය වැඩිදුරටත් සඳහන් කර තිබේ.
