ඉරානයට එල්ල වූ ප්රහාරයට පැය 48කටත් අඩු කාලයකට පෙර, ඊශ්රායල අගමැති බෙන්ජමින් නෙතන්යාහු සහ ඇමරිකානු ජනාධිපති ඩොනල්ඩ් ට්රම්ප් අතර පැවැති ඉතා රහසිගත දුරකථන සංවාදයක තොරතුරු මේ වන විට වාර්තා වී තිබේ. මෙම ප්රහාරය සැලසුම් කර ඇත්තේ ඩොනල්ඩ් ට්රම්ප් ඝාතනය කිරීමට ඉරානය දරන ලද උත්සාහයන්ට පළිගැනීමක් ලෙස සහ එරට ඉහළම නායකත්වය ඉලක්ක කරගත් “හිස ගසා දැමීමේ ප්රහාරයක්” (Decapitation strike) ලෙස බව රොයිටර් පුවත් සේවය සඳහන් කරයි.
බුද්ධි අංශ වාර්තාවලට අනුව, ඉරාන උත්තරීතර නායක අයතුල්ලා අලි කමේනි ඇතුළු ජ්යෙෂ්ඨ නිලධාරීන් ටෙහෙරාන් නුවර පිහිටි සංකීර්ණයකට රැස්වන බවට තොරතුරු ලැබී තිබුණි. මුලින් මෙම රැස්වීම සෙනසුරාදා රාත්රියේ පැවැත්වීමට නියමිතව තිබුණද, පසුව එය එදිනම උදෑසන දක්වා වෙනස් වී ඇති බවට ලැබුණු නවතම බුද්ධි තොරතුරු මත ප්රහාරය එල්ල කිරීමට තීරණය කර ඇත. මැදපෙරදිග කලාපයේ පවතින යුදමය වාතාවරණය හමුවේ මෙවැනි ප්රහාර එල්ල වීම ගෝලීය ගුවන් සේවා සහ ආර්ථික ස්ථාවරත්වයට ද දැඩි බලපෑම් එල්ල කරමින් පවතී.
මැදපෙරදිග අස්ථාවරත්වය හේතුවෙන් ගුවන් සේවා ඉන්ධන මිල ඉහළ යාමේ අවදානමක් පවතින බවත්, මත්තල ගුවන් තොටුපළ වැනි විකල්ප මධ්යස්ථාන භාවිත කිරීමේ වැදගත්කමත් ආර්ථික විශ්ලේෂකයෝ මෙහිදී පෙන්වා දෙති. මෙම යුදමය වාතාවරණය හේතුවෙන් ශ්රී ලංකාව වැනි රටවල සංචාරක ක්ෂේත්රයට සහ බලශක්ති සැපයුමට එල්ල විය හැකි බලපෑම් පිළිබඳව ද දැඩි අවධානයක් යොමු වී තිබේ.
