දකුණු ආසියානු කලාපයේ ප්රථම 4D Angio CT ඒකකය සහ නවීන පහසුකම්වලින් සමන්විත දන්ත වෛද්ය ඒකකයක් අද (24) සෞඛ්ය අමාත්ය නලින්ද ජයතිස්ස මහතාගේ ප්රධානත්වයෙන් ශ්රී ජයවර්ධනපුර මහා රෝහලේදී විවෘත කෙරිණි. ජපාන රජය විසින් ලබාදෙන ලද රුපියල් බිලියනයකට අධික මූල්ය ප්රදානයක් යටතේ ක්රියාත්මක වූ මෙම ව්යාපෘතිය හරහා මෙතෙක් ශ්රී ලංකාවේ රාජ්ය හෝ පෞද්ගලික රෝහල් පද්ධතිය තුළ නොතිබූ අතිනවීන වෛද්ය තාක්ෂණය මෙරටට හඳුන්වා දී තිබේ. මෙම 4D Angio CT පද්ධතිය මඟින් රෝග විනිශ්චය සහ ප්රතිකාර කිරීමේ හැකියාව සැලකිය යුතු ලෙස ඉහළ නැංවෙන අතර රෝගීන්ට වඩාත් වේගවත් හා නිවැරදි වෛද්ය මැදිහත්වීම් ලබා ගැනීමට මෙයින් අවස්ථාව හිමිවනු ඇත.
මීට අමතරව, නවීන දන්ත වෛද්ය පුටු 10කින් සමන්විත නව දන්ත සෞඛ්ය ඒකකයක් ද මෙහිදී විවෘත කළ අතර එමඟින් රෝහලට පැමිණෙන රෝගීන්ට ලබාදෙන දන්ත ප්රතිකාර ධාරිතාව පුළුල් කිරීමට පියවර ගෙන ඇත. මෙම අවස්ථාවට එක්වෙමින් සෞඛ්ය අමාත්ය නලින්ද ජයතිස්ස මහතා අවධාරණය කළේ, මෙවැනි දියුණු තාක්ෂණයන්ගෙන් උපරිම ප්රයෝජන ගෙන රෝගීන්ගේ පොරොත්තු ලේඛන අවම කිරීමට සෞඛ්ය කාර්ය මණ්ඩලය කැපවිය යුතු බවයි. වර්තමාන සෞඛ්ය අවශ්යතාවලට සරිලන පරිදි ශ්රී ජයවර්ධනපුර රෝහලේ පහසුකම් නවීකරණය කරමින් සහ කාර්ය මණ්ඩල ධාරිතාව පුළුල් කරමින් එය මෙරට ප්රමුඛතම රෝහලක් බවට පත් කිරීම රජයේ අරමුණ බව ද අමාත්යවරයා වැඩිදුරටත් ප්රකාශ කළේය.
