ඇමෙරිකා එක්සත් ජනපදය සහ ඊශ්රායලය සමඟ පවතින දරුණු යුදමය වාතාවරණය මධ්යයේ, අන්තර්ජාලය හරහා රට අස්ථාවර කිරීමට උත්සාහ කළ බවට චෝදනා කරමින් පුද්ගලයන් 466 දෙනෙකු අත්අඩංගුවට ගැනීමට ඉරාන බලධාරීන් පියවර ගෙන තිබේ. ඉරාන රජයේ නිල පුවත් ඒජන්සිය වන IRNA වාර්තා කරන අන්දමට, මෙම පිරිස මහජන මතය අවුල් කිරීම, සමාජය තුළ බිය සහ කාංසාව ඇති කිරීම මෙන්ම සතුරාට පක්ෂව ප්රචාරක කටයුතු මෙහෙයවීම යන චෝදනාවලට ලක්ව ඇත. කෙසේ වෙතත්, මෙම අත්අඩංගුවට ගැනීම් සිදු වූ නිශ්චිත දින වකවානු හෝ ඔවුන් සිදු කළ අන්තර්ජාල ක්රියාකාරකම්වල ස්වභාවය පිළිබඳව නිවැරදි තොරතුරු අනාවරණය කර නොමැත.
පසුගිය පෙබරවාරි 28 වැනිදා ඇමෙරිකා සහ ඊශ්රායල ගුවන් ප්රහාරවලින් ඉරාන උත්තරීතර නායකයා මියයාමත් සමඟ ආරම්භ වූ මෙම යුද්ධය හේතුවෙන් ඉරානය පුරා අන්තර්ජාල සබඳතා සම්පූර්ණයෙන්ම විසන්ධි කිරීමට එරට රජය පියවර ගෙන තිබුණි. ජාත්යන්තර අන්තර්ජාල නිරීක්ෂණ ආයතනයක් වන Netblocks සඳහන් කරන්නේ ඉරානයේ මෙම අන්තර්ජාල අඳුරු කිරීම (Internet Blackout) අද වන විට දින 25ක් පුරා අඛණ්ඩව ක්රියාත්මක වන බවයි. මේ වන විට ඉරානය තුළ ලෝක අන්තර්ජාලයට (Worldwide Internet) ප්රවේශ වීමට අවසර ලැබී ඇත්තේ බලයලත් සුළු පිරිසකට පමණක් වන අතර, සාමාන්ය වැසියන්ට භාවිත කළ හැක්කේ දේශීය සන්නිවේදන ජාලයන් පමණි.
මෙම දැඩි වාරණයන් මධ්යයේ ඇතැම් පිරිස් VPN තාක්ෂණය හෝ ස්ටාර්ලින්ක් (Starlink) චන්ද්රිකා පද්ධතිය හරහා හොර රහසේ අන්තර්ජාලයට සම්බන්ධ වීමට උත්සාහ කරන අතර, ඉරාන නීතියට අනුව එය සිරදඬුවම් ලැබිය හැකි බරපතළ වරදකි. යුදමය තත්ත්වය හමුවේ තොරතුරු ගලායාම පාලනය කිරීම සහ අභ්යන්තර ආරක්ෂාව තහවුරු කිරීම සඳහා මෙම පියවර ගත් බව ඉරාන පොලිසිය අවධාරණය කරයි. මෙම අත්අඩංගුවට ගැනීම් මඟින් පෙන්නුම් කරන්නේ යුද්ධය හමුවේ ඉරාන පාලනය සිය වැසියන්ගේ ඩිජිටල් ක්රියාකාරකම් කෙරෙහි දක්වන අතිශය දැඩි මර්දනකාරී පිළිවෙතයි.
