අමෙරිකානු ජනාධිපති ඩොනල්ඩ් ට්රම්ප් සහ ඉරානය අතර සටන් විරාමයක් සඳහා සාකච්ඡා පැවැත්වෙන බවට වොෂින්ටනයෙන් නිකුත් වන ප්රකාශයන් දැඩි ලෙස උපහාසයට ලක් කිරීමට ඉරාන හමුදා ප්රකාශකයෙකු වන ලුතිනන් කර්නල් ඊබ්රාහිම් සොල්ෆගාරි (Ebrahim Zolfaghari) අද (2026 මාර්තු 25) පියවර ගෙන තිබේ. ඉරාන රාජ්ය රූපවාහිනිය ඔස්සේ ප්රකාශයක් කරමින් ඔහු විමසා සිටියේ ට්රම්ප් පාලනය මේ වන විට “තමන් සමඟම සාකච්ඡා පවත්වන” මට්ටමකට ඇද වැටී ඇත්ද යන්නයි.
පසුගිය දින කිහිපය තුළ දෙපාර්ශවය අතර දරුණු ඩ්රෝන සහ මිසයිල ප්රහාර හුවමාරු වෙමින් පවතින පසුබිමක, අමෙරිකානු රජය විසින් පකිස්ථානය හරහා කරුණු 15කින් යුත් සටන් විරාම යෝජනාවලියක් ඉරානය වෙත යොමු කර ඇති බවට වාර්තා පළ විය. මේ පිළිබඳව අදහස් දක්වමින් සොල්ෆගාරි මහතා පවසා සිටියේ අමෙරිකාව අත්විඳින මෙම උපායමාර්ගික පරාජය “එකඟතාවක්” ලෙස ලෝකයට පෙන්වීමට උත්සාහ නොකරන ලෙසයි. “හිස් පොරොන්දු ලබා දෙන ඔබේ යුගය දැන් අවසන්” යැයි ද ඔහු එහිදී අවධාරණය කළේය.
“ලෝක සුපිරි බලවතා යැයි කියා ගන්නා ඔබ මේ වන විට සිටින්නේ දැඩි අර්බුදයකයි. ඔබ පවසන සාකච්ඡා පිළිබඳ පුවත් හුදෙක් ඔබ විසින්ම මවාගත් ඒවා මිස අප සමඟ කරන සාකච්ඡා නොවේ. අපේ පළමු සහ අවසාන වචනය වන්නේ ඔබ වැනි අයෙකු සමඟ කිසිදා එකඟතාවකට නොපැමිණෙන බවයි.” යනුවෙන් ඔහු වැඩිදුරටත් පවසා තිබේ. ඩොනල්ඩ් ට්රම්ප් මහතා මීට පෙර ඉරානය සමඟ ගනුදෙනු කිරීමට තමන් සූදානම් බව පැවසුවද, ඉරාන හමුදා අංශවලින් දිගින් දිගටම එල්ල වන්නේ එවැනි සාකච්ඡා පවතින බව ප්රතික්ෂේප කරන ප්රකාශයන්ය.
