පවතින මැදපෙරදිග අර්බුදය, විදේශ විනිමය හිඟය, ඉන්ධන මිල ඉහළ යාම සහ භාණ්ඩ හා සේවා පිරිවැය ඉහළ යාම හමුවේ දේශීය වෙළෙඳපොළේ ඖෂධ මිල ගණන් සීඝ්රයෙන් ඉහළ යාමේ නොවැළැක්විය හැකි අවදානමක් පවතින බව වෛද්ය සහ සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සම්මේලනයේ සභාපති, විශේෂඥ වෛද්ය චමල් සංජීව මහතා ප්රකාශ කරයි. ඉහළ යන පිරිවැයට සාපේක්ෂව මිල සංශෝධනය කිරීම කෙරෙහි ඖෂධ ආනයනකරුවන් සහ දේශීය නිෂ්පාදකයින් මේ වන විටත් අවධානය යොමු කර ඇති බව ඔහු පෙන්වා දෙයි.
වත්මන් ආර්ථික තත්ත්වය හමුවේ ඖෂධ මිල ඉහළ දැමීම සාමාන්ය ජනතාවට දැරිය නොහැකි බරක් වනු ඇති බවත්, විශේෂයෙන්ම දියවැඩියාව, අධික රුධිර පීඩනය, හෘද රෝග, වකුගඩු රෝග සහ මානසික රෝග වැනි දිගුකාලීන ප්රතිකාර ලබන රෝගීන්ට මෙයින් දැඩි බලපෑමක් එල්ල වන බවත් වෛද්යවරයා අවධාරණය කළේය. රජය විසින් ඖෂධ මිල පාලනය කිරීම සඳහා ගැසට් නිවේදන නිකුත් කර තිබුණද, ඇතැම් ඔසුසැල් නියමිත මිලට වඩා වැඩි මිලට ඖෂධ අලෙවි කිරීම පොදු තත්ත්වයක් වී ඇති බවට ද ඔහු චෝදනා කරයි.
මෙම තත්ත්වය පාලනය කිරීම සඳහා රජය වහා මැදිහත් විය යුතු බවත්, අඩු ආදායම්ලාභී පවුල් සඳහා පෞද්ගලික ඔසුසැල්වලින් ඖෂධ මිලදී ගැනීමේදී සහනාධාර හෝ සහනදායී ක්රමවේදයක් හඳුන්වා දිය යුතු බවත් වෛද්ය සංජීව මහතා ඉල්ලා සිටියි. එසේ නොවුවහොත්, පවතින ජීවන වියදම ඉහළ යාම සමඟ ජනතාවට අවශ්ය ඖෂධ ලබා ගැනීමට නොහැකි වීමෙන් බරපතල මහජන සෞඛ්ය අර්බුදයක් නිර්මාණය විය හැකි බවට ද ඔහු අනතුරු ඇඟවීය.
