ශ්රී ලංකාවේ වෛද්ය ක්ෂේත්රයේ සුවිශේෂී සන්ධිස්ථානයක් සනිටුහන් කරමින්, දකුණු ආසියානු කලාපයේ ප්රථම 4D Angio CT පද්ධතිය ශ්රී ජයවර්ධනපුර මහා රෝහලේදී ඊයේ (24) විවෘත කෙරිණි. ජපන් රජයේ රුපියල් මිලියන 925ක මූල්ය ආධාර මත ස්ථාපිත කරන ලද මෙම අතිනවීන වෛද්ය උපකරණ පද්ධතිය සෞඛ්ය අමාත්ය වෛද්ය නලින්ද ජයතිස්ස මහතා සහ ශ්රී ලංකාවේ ජපන් තානාපති අකියෝ ඉසොමාටා (Akio Isomata) මහතාගේ ප්රධානත්වයෙන් ජනතා අයිතියට පත් කරන ලදී.
මෙම නව පද්ධතියට අමතරව, ජපන් රජයේ රුපියල් මිලියන 91ක මූල්ය පරිත්යාගයෙන් ඉදිවූ දන්ත වෛද්ය ඒකකයක් ද රෝහලට අලුතින් එක් විය. දන්ත වෛද්ය පුටු 10කින් සමන්විත මෙම ඒකකය මගින් මෙතෙක් ශ්රී ජයවර්ධනපුර රෝහලේ දන්ත ප්රතිකාර සඳහා පැවති අඩුපාඩුව මඟ හැරී යන අතර, රෝගීන්ට වඩාත් කාර්යක්ෂම සේවාවක් ලබා ගැනීමට අවස්ථාව හිමි වේ.
මෙහිදී අදහස් දැක්වූ අමාත්යවරයා සඳහන් කළේ, මෙම 4D Angio CT පද්ධතිය ජාතික සම්පතක් බවත්, එය උපරිම ධාරිතාවයෙන් යුතුව භාවිත කර රෝගීන්ගේ පොරොත්තු ලේඛන අවම කිරීමට රෝහල් කාර්ය මණ්ඩලය කැපවිය යුතු බවත්ය. හිටපු ජනාධිපති ජේ.ආර්. ජයවර්ධන මහතාට උපහාරයක් ලෙස ජපන් රජය විසින් මෙරටට පරිත්යාග කළ මෙම රෝහල, වර්තමානය වන විට ශ්රී ලංකාවේ සෞඛ්ය පද්ධතිය තුළ සුවිශේෂී මෙහෙවරක් ඉටු කරන බව ද ඔහු වැඩිදුරටත් පැවසීය. මෙම උත්සවයේදී රෝහලේ නිල වෙබ් අඩවිය ද දියත් කරන ලද අතර, ජපන් තානාපති කාර්යාලයේ නියෝජිතයින් සහ රෝහල් කළමනාකාරීත්වය ඇතුළු පිරිසක් මෙම අවස්ථාවට එක්ව සිටියහ.
