මැදපෙරදිග පවතින යුද වාතාවරණය හේතුවෙන් හටගෙන ඇති බලශක්ති අර්බුදය හමුවේ වුවද, දිවයිනේ අධ්යාපන විභාග සහ රෝහල් සඳහා අවශ්ය ඖෂධ සැපයුම කිසිදු බාධාවකින් තොරව පවත්වාගෙන යාමට අමාත්ය මණ්ඩල අනුකමිටුව තීරණය කර තිබේ. අග්රාමාත්ය ආචාර්ය හරිනි අමරසූරිය මහත්මියගේ ප්රධානත්වයෙන් ඊයේ (2026 මාර්තු 25) පස්වරුවේ ජනාධිපති කාර්යාලයේදී පැවැති රාජ්ය සේවය විධිමත් කිරීමේ අමාත්ය අනුකමිටු රැස්වීමේදී මෙම තීරණ ගෙන ඇත. රාජ්ය පරිපාලන, සෞඛ්ය, අධ්යාපන සහ අධිකරණ යන අමාත්යාංශවල සේවාවන් අඛණ්ඩව පවත්වාගෙන යාම සහ රාජ්ය සේවකයන් මුහුණ දෙන ගැටලු මඟහරවා ගැනීම පිළිබඳව මෙහිදී දීර්ඝ ලෙස සාකච්ඡා වී තිබේ.
පවතින බලශක්ති අභියෝග හමුවේ මගී ප්රවාහන සහ දුම්රිය සේවාවන් පවත්වාගෙන යාම මෙන්ම අත්යවශ්ය ද්රව්ය ප්රවාහනය විධිමත් කිරීම කෙරෙහි ද රජයේ අවධානය යොමු වී ඇත. විශේෂයෙන්ම රාජ්ය සේවාවන් වඩාත් වේගවත් කිරීම සඳහා ඩිජිටල් සේවා පද්ධති හඳුන්වා දීමටත්, හැකි අවස්ථාවලදී නිවසේ සිට වැඩ කිරීමේ (Work from Home) ක්රමවේදය ක්රියාත්මක කිරීමටත් මෙහිදී යෝජනා වී තිබේ. ඩිජිටල් ආර්ථික අමාත්යාංශයේ අධීක්ෂණය යටතේ මෙම කටයුතු සිදු කිරීමට නියමිත අතර, සියලුම රජයේ ආයතනවල බලශක්ති කළමනාකරණය සඳහා අවශ්ය ප්රතිපත්තිමය වෙනස්කම් සිදු කරන ලෙස ද අග්රාමාත්යවරිය මෙහිදී උපදෙස් ලබා දී ඇත.
