ඉන්දු – ශ්රී ලංකා ආරක්ෂක කර්මාන්ත සම්මන්ත්රණය අද (2026 මාර්තු 25) කොළඹ ටාජ් සමුද්රා හෝටල් පරිශ්රයේදී උත්කර්ෂවත් අයුරින් පැවැත්විණි. “නව අවස්ථා හඳුනාගැනීම සහ නව සබඳතා ගොඩනැගීම” යන තේමාව යටතේ ශ්රී ලංකාවේ ඉන්දීය මහකොමසාරිස් කාර්යාලය විසින් තෙවන වරටත් සංවිධානය කරන ලද මෙම සම්මන්ත්රණයේ ප්රධාන ආරාධිත අමුත්තා ලෙස ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා මහතා සහභාගී වූ අතර, ඉන්දීය මහකොමසාරිස් සන්තෝෂ් ජා (Santosh Jha) මහතා විසින් ඔහුව උණුසුම් අයුරින් පිළිගනු ලැබීය.
මෙහිදී අදහස් දැක්වූ ආරක්ෂක ලේකම්වරයා අවධාරණය කළේ, දෙරට අතර පවතින්නේ අන්යෝන්ය විශ්වාසය සහ පොදු ආරක්ෂක අවශ්යතා මත පදනම් වූ දීර්ඝකාලීන සහ ශක්තිමත් සබඳතාවක් බවයි. ඉන්දියාවේ වේගයෙන් දියුණු වන ආරක්ෂක නිෂ්පාදන ක්ෂේත්රය හරහා ශ්රී ලංකාවට නවීන තාක්ෂණික මෙවලම්, තාක්ෂණික හුවමාරුව සහ ඒකාබද්ධ ව්යාපාර සඳහා වටිනා අවස්ථාවන් රැසක් හිමිවන බව ඔහු පෙන්වා දුන්නේය. මෙම සහයෝගීතාවය මගින් ශ්රී ලංකාවේ ආරක්ෂක අංශවල මෙහෙයුම් සූදානම ඉහළ නැංවීමටත්, පිරිවැයමය වශයෙන් ඵලදායී නූතන තාක්ෂණයට ප්රවේශ වීමටත් මග විවර වන බව ද එහිදී වැඩිදුරටත් සඳහන් විය.
