බටහිර බෙංගාලයේ සිදුකරන විශේෂ දැඩි සංශෝධන (SIR) ක්රියාවලිය යටතේ විනිසුරුවරුන් විසින් පරීක්ෂාවට ලක් කළ ඡන්දදායකයින් මිලියන 3.2ක (ලක්ෂ 32ක) ලේඛනවලින් 35%ත් 40%ත් අතර ප්රමාණයක් ඡන්ද හිමි නාමලේඛනයෙන් ඉවත් කර ඇති බව ඉන්දීය මැතිවරණ කොමිසමේ ජ්යෙෂ්ඨ නිලධාරීහු ප්රකාශ කරති. “තාර්කික විෂමතා” (Logical Discrepancy) පවතින බවට හඳුනාගත් මෙම නාමලේඛන සම්බන්ධයෙන් අධිකරණ නිලධාරීන් විසින් පසුගිය බදාදා (2026 මාර්තු 25) වන විට අවසන් තීරණ ලබා දී තිබේ.
කොල්කටා මහාධිකරණය විසින් පත් කරන ලද අධිකරණ නිලධාරීන් වෙත ඡන්දදායකයින් මිලියන හයකට අධික පිරිසකගේ හිමිකම් පරීක්ෂා කිරීම සඳහා යොමු කර තිබූ අතර, ඉන් මිලියන 2.9ක් පමණ මාර්තු 23 වන විට විමර්ශනය කර අවසන් කර ඇත. කෙසේ වෙතත් පසුගිය සඳුදා මධ්යම රාත්රියේ ප්රකාශයට පත් කළ පළමු අතිරේක නාමලේඛනයට (First Supplementary List) ඇතුළත් කර ඇත්තේ මිලියනයක (ලක්ෂ 10ක) පමණ පිරිසකගේ නම් පමණක් බව වාර්තා වේ.
මෙම නාමලේඛනය නිකුත් කිරීමත් සමඟ පද්ධතියේ ඇති වූ තාක්ෂණික දෝෂ හේතුවෙන් බෙංගාලයේ සියලුම ඡන්දදායකයින්ගේ නම් “විමර්ශනය වෙමින් පවතී” (Under Adjudication) යනුවෙන් පැය කිහිපයක් දර්ශනය වීම නිසා මහජනතාව අතර විශාල නොසන්සුන්තාවක් ඇති විය. පළමු ලැයිස්තුවේදී ප්රතික්ෂේප වූ පුද්ගලයින්ගේ නිශ්චිත සංඛ්යාලේඛන මැතිවරණ කොමිසම මෙතෙක් නිල වශයෙන් ප්රකාශයට පත් කර නොමැති අතර, ඉදිරි දිනවලදී දෙවන අතිරේක ලැයිස්තුව නිකුත් කිරීමට නියමිතය.
