වසර සිය ගණනක ඉතිහාසයක් ඇති ඇංග්ලිකානු සභාවේ ප්රධානියා හෙවත් කැන්ටබරිහි අග්රගණ්ය අග්රබිෂොප් (Archbishop of Canterbury) ධුරයට පත්වූ ප්රථම කාන්තාව ලෙස 63 හැවිරිදි සාරා මුලාලි මහත්මිය ඊයේ (2026 මාර්තු 25) ඉතිහාසගත විය. ලොව පුරා විසිරී සිටින මිලියන 85ක ඇංග්ලිකානු බැතිමතුන්ගේ ආධ්යාත්මික නායකත්වය දරන මෙම ධුරය සඳහා ඇයව නිල වශයෙන් අභිෂේක කිරීමේ ඓතිහාසික උත්සවය ගිනිකොනදිග එංගලන්තයේ කැන්ටබරි ආසන දෙව්මැදුරේදී (Canterbury Cathedral) ඉතා උත්කර්ෂවත් අයුරින් පැවැත්විණි.
මෙම උත්සවය සඳහා බ්රිතාන්ය ඔටුන්න හිමි විලියම් කුමරු සහ කැතරින් කුමරිය ඇතුළු 2,000කට අධික සම්භාවනීය අමුත්තන් පිරිසක් සහභාගී වූහ. සාම්ප්රදායික චාරිත්රවලට අනුව ඇය සිය සැරයටියෙන් ආසන දෙව්මැදුරේ බටහිර දොරටුවට තෙවරක් තට්ටු කර ඇතුළු වීමට අවසර ඉල්ලා සිටි අතර, එහිදී පාසල් දරුවන් විසින් ඇය පැමිණි හේතුව විමසූ විට, “මම ක්රිස්තුස් වහන්සේගේ ප්රේමය ප්රකාශ කිරීමට සහ ඔබට සේවය කිරීමට අග්රබිෂොප්වරිය ලෙස පැමිණියෙමි” යනුවෙන් ඇය පිළිතුරු දුන්නාය.
හිටපු වින්නඹු මාතාවක් (Midwife) වන සාරා මුලාලි මහත්මිය බ්රිතාන්ය ජාතික සෞඛ්ය සේවයේ (NHS) දශක තුනකට අධික කාලයක් සේවය කර ඇති අතර, 1999 වසරේදී එංගලන්තයේ ප්රධාන හෙද නිලධාරිනිය ලෙස ද කටයුතු කර තිබේ. ඇගේ පූර්වගාමියා වූ ජස්ටින් වෙල්බි (Justin Welby), 1970 දශකයේ සිදුවූ ලිංගික අපයෝජන සිද්ධීන් වසන් කිරීමේ චෝදනාව මත 2024 නොවැම්බර් මාසයේදී සිය ධුරයෙන් ඉල්ලා අස්විය. ඒ අනුව සාරා මුලාලිගේ මෙම පත්වීම ඇංග්ලිකානු සභාවේ නව පරිච්ඡේදයක ආරම්භයක් ලෙස ලෝක අවධානයට ලක්ව ඇත.
