ජර්මනියේ සුප්රසිද්ධ Volkswagen (VW) මෝටර් රථ සමාගම, වසා දැමීමේ තර්ජනයට ලක්ව ඇති සිය ඔස්නාබෘක් (Osnabrück) කර්මාන්තශාලාව ආරක්ෂක උපකරණ කොටස් නිෂ්පාදනය කරන මධ්යස්ථානයක් බවට පත් කිරීම කෙරෙහි අවධානය යොමු කර ඇති බව වාර්තා වේ. මේ සම්බන්ධයෙන් ඊශ්රායලයේ ප්රමුඛතම ආරක්ෂක නිෂ්පාදන සමාගමක් වන ‘රෆායෙල්’ (Rafael Advanced Defense Systems) සමඟ සාකච්ඡා පවත්වන බවට ජාත්යන්තර මාධ්ය වාර්තා පළ වී තිබේ. රෆායෙල් සමාගම යනු ඊශ්රායලයේ ප්රබල ගුවන් ආරක්ෂක පද්ධතියක් වන ‘අයර්න් ඩෝම්’ (Iron Dome) නිෂ්පාදනය කරනු ලබන ප්රධාන ආයතනයයි.
මෙම කර්මාන්තශාලාව තුළ සෘජුවම අවි ආයුධ නිෂ්පාදනය කිරීම Volkswagen සමාගම විසින් ප්රතික්ෂේප කර ඇතත්, ආරක්ෂක අංශවලට අවශ්ය අනුබද්ධ කොටස් නිෂ්පාදනය කිරීම පිළිබඳව පවතින වාර්තා ඔවුන් ස්ථිරවම ප්රතික්ෂේප කර නොමැත. සමාගම් ප්රකාශකයෙකු සඳහන් කළේ 2027 වසරේදී එහි මෝටර් රථ නිෂ්පාදන කටයුතු අවසන් වීමෙන් පසු එම ස්ථානය භාවිතා කළ හැකි විකල්ප ක්රම පිළිබඳව විවිධ පාර්ශව සමඟ සාකච්ඡා කරමින් සිටින නමුත් මෙතෙක් අවසන් තීරණයක් ගෙන නොමැති බවයි.
ඔස්නාබෘක් කර්මාන්තශාලාව වසා දැමුවහොත් එහි සේවය කරන 2,300ක පමණ පිරිසකට රැකියා අහිමි වීමේ අවදානමක් පවතී. කෙසේ වෙතත්, ඊශ්රායලයේ රෆායෙල් සමාගම සමඟ එකඟතාවකට පැමිණියහොත් එම සියලුම රැකියා සුරක්ෂිත කර ගැනීමට අවස්ථාව හිමිවනු ඇත. මෙය ජර්මනියේ මෝටර් රථ කර්මාන්තය සහ සීඝ්රයෙන් වර්ධනය වන ආරක්ෂක ක්ෂේත්රය (Defence Sector) අතර ඇතිවන සුවිශේෂී සබඳතාවක ආරම්භයක් වනු ඇති බව ආර්ථික විශ්ලේෂකයෝ පෙන්වා දෙති.
