ලොව සුප්රසිද්ධ හැරී පොටර් නවකතා මාලාව ඇසුරින් HBO නාලිකාව මගින් අලුතින්ම නිර්මාණය කරන ලද ටෙලි කතා මාලාවේ ප්රථම නිල ප්රචාරක පටය ඊයේ (2026 මාර්තු 25) නිකුත් විය. මීට පෙර මෙම කතා මාලාව 2027 වසරේදී විකාශනය වීමට නියමිතව තිබුණද, නවතම වාර්තාවලට අනුව එහි පළමු අදියර (Season 1) එළඹෙන නත්තල් සමයේදීම ප්රේක්ෂකයින් වෙත සමීප කිරීමට නියමිතය. විනාඩි දෙකක කාලයකින් යුත් මෙම ප්රචාරක පටය හරහා නැවත වරක් හෝග්වර්ට්ස් (Hogwarts) මායා ලෝකයේ අපූර්වත්වය දැකගත හැකිය.
මෙහිදී හැරී පොටර් ලෙස ඩොමිනික් මැක්ලොක්ලින් (Dominic McLaughlin) රංගනයෙන් දායක වන අතර, ඇල්බස් ඩම්බල්ඩෝර් ලෙස ජෝන් ලිත්ගෝ (John Lithgow) සහ සෙවෙරස් ස්නේප් ලෙස පාපා එසියේඩු (Paapa Essiedu) රංගනයේ යෙදෙති. මීට අමතරව මිනර්වා මැක්ගොනගල්ගේ චරිතය සඳහා ජැනට් මැක්ටියර් (Janet McTeer) තෝරාගෙන තිබේ. මෙම ප්රචාරක පටය තුළ හැරී සිය 11 වන උපන්දිනයේදී මායා ලෝකයට පිවිසෙන ආකාරයත්, එහිදී ඔහු මුහුණ දෙන අභියෝග සහ පැරණි සතුරන් පිළිබඳවත් ඉඟි පළ කර ඇත.
ප්රේක්ෂකයින් අතරින් මෙම ප්රචාරක පටයට යහපත් ප්රතිචාර ලැබී ඇති අතර, බොහෝ දෙනෙකු පවසා ඇත්තේ මෙහි වර්ණ සංකලනය සහ පසුබිම පෙර චිත්රපට මාලාවට වඩා තරමක් අඳුරු සහ තාත්වික ස්වභාවයක් ගන්නා බවයි. කෙසේ වෙතත්, ප්රචාරක පටය තුළ මායා කර්ම (Magic) ප්රදර්ශනය කිරීම අවම මට්ටමක පැවතීම පිළිබඳව ඇතැම් රසිකයින් සිය මවිතය පළ කර තිබේ.
