පෙබරවාරි 28 වනදා ආරම්භ වූ ඉරාන යුද්ධයත් සමඟ ඉන්ධන මිල දෙගුණයකට වඩා අධික ලෙස ඉහළ යාමට එරෙහිව පිලිපීනයේ මැනිලා නුවර සිය ගණනක් ප්රවාහන සේවකයෝ අද (2026 මාර්තු 26) දැවැන්ත වැඩවර්ජනයක් ආරම්භ කර ඇත. පිලිපීනය මේ වන විට ජාතික බලශක්ති හදිසි අවස්ථාවකට (National Energy Emergency) මුහුණ දී සිටින අතර, ඩීසල් සහ පෙට්රල් මිල දරාගත නොහැකි මට්ටමට ඉහළ යාම නිසා මෙම විරෝධතා මතු වී තිබේ.
පිලිපීනයේ ජනප්රිය ප්රවාහන මාධ්යයක් වන ‘ජීප්නි’ (Jeepney) රථ රියදුරන් ප්රමුඛව පවත්වන මෙම වර්ජනය සඳහා යතුරුපැදි සහ කුලී රථ රියදුරන් ද එක්ව සිටින බව වාර්තා වේ. වර්ජනයේ නිරත පිරිස් රජයෙන් ඉල්ලා සිටින්නේ ඉන්ධන බදු ඉවත් කරන ලෙසත්, ඉන්ධන මිල පාලනය සඳහා රජයේ මැදිහත්වීමක් සිදු කරන ලෙසත්ය. මීට අමතරව, ප්රවාහන ගාස්තු සහ දෛනික වේතනය ඉහළ නංවන ලෙස ද ඔවුහු බලකර සිටිති.
විරෝධතාවයට එක්වූ 62 හැවිරිදි රියදුරෙකු බීබීසී (BBC) පුවත් සේවයට පවසා ඇත්තේ, තමන්ට සිය දරුවන් පස්දෙනාට ආහාර සැපයීමටවත් ආදායමක් නොමැති බවත්, රජය පොරොන්දු වූ මූල්ය ආධාර මෙතෙක් ලැබී නොමැති බවත්ය. පිලිපීන ජනාධිපති ෆර්ඩිනන්ඩ් මාකෝස් පවසා ඇත්තේ නව තෙල් මූලාශ්ර සොයා ගැනීමට රජය උපරිම උත්සාහයක නිරත වන බවයි. කෙසේ වෙතත්, පවතින උද්ධමනය හමුවේ බොහෝ රියදුරන් සිය රැකියා අත්හැර ගම්බිම් බලා යාමට සූදානම් වන බව ද වාර්තා වේ.
