වෙනත් පුද්ගලයන්ගේ QR කේත අවභාවිත කරමින් වංචනික ලෙස ඉන්ධන ලබාගැනීමේ සිද්ධීන් සම්බන්ධයෙන් පැමිණිලි 1,000කට අධික ප්රමාණයක් ලැබී ඇති බව ඩිජිටල් ආර්ථික අමාත්යාංශය අද (26) නිවේදනය කළේය. අමාත්යාංශ ලේකම් වර්ණ ශ්රී ධනපාල මහතා සඳහන් කළේ මෙම වංචනික ක්රියාවලට සම්බන්ධ පුද්ගලයන් අත්අඩංගුවට ගැනීම සඳහා පොලීසිය සමඟ එක්ව පුළුල් විමර්ශනයක් ආරම්භ කර ඇති බවයි.
ලැබී ඇති පැමිණිලි අතරින් 150කට අධික ප්රමාණයක් මේ වන විටත් විධිමත් පොලිස් පරීක්ෂණ සඳහා යොමු කර ඇති අතර, ඉන් කිහිපදෙනෙකු දැනටමත් අත්අඩංගුවට ගෙන තිබේ. ඉන්ධන පිරවුම්හල්වල සවිකර ඇති ආරක්ෂිත කැමරා (CCTV) දර්ශන සියුම් ලෙස පරීක්ෂා කරමින් මෙම වංචනිකයන් හඳුනා ගැනීමට කටයුතු කරන බව ලේකම්වරයා අවධාරණය කළේය. මිලියන 6කට අධික පිරිසක් මේ වන විටත් මෙම ක්රමවේදය යටතේ ලියාපදිංචි වී ඇති පසුබිමක, ඇතැම් සිද්ධීන් නොදැනුවත්කම නිසා සිදු වූ අත්වැරදීම් වුවද, සංවිධානාත්මකව සිදුකරන වංචාවලට එරෙහිව දැඩිව නීතිය ක්රියාත්මක කිරීමට රජය තීරණය කර ඇත. 1919 රජයේ තොරතුරු කේන්ද්රය හරහා ද මෙවැනි අවභාවිතයන් පිළිබඳව පැමිණිලි කිරීමට මහජනතාවට අවස්ථාව සලසා දී තිබේ.
