පෙබරවාරි 28 වනදා ආරම්භ වූ ඉරාන යුද්ධය හේතුවෙන් ඇමරිකානු අවි ගබඩාවල පවතින සීමිත සහ වටිනාම අවි ආයුධ ශීඝ්රයෙන් ක්ෂය වෙමින් පවතින බව වොෂින්ටන් පෝස්ට් (The Washington Post) පුවත්පත අද (2026 මාර්තු 26) වාර්තා කළේය. මේ හේතුවෙන් රුසියානු ආක්රමණයට එරෙහිව සටන් කරන යුක්රේනය වෙත ලබා දීමට සැලසුම් කර තිබූ මිසයිල පද්ධති සහ අනෙකුත් යුද උපකරණ මැදපෙරදිග කලාපය (බටහිර ආසියාව) වෙත හරවා යැවීමට පෙන්ටගනය සලකා බලමින් සිටින බව වාර්තා වේ.
විශේෂයෙන්ම ‘පේට්රියට්’ (Patriot) සහ ‘තාඩ්’ (THAAD) වැනි ප්රමුඛ පෙළේ ගුවන් ආරක්ෂක මිසයිල පද්ධති මෙලෙස හරවා යැවීමට නියමිතය. මෙම අවි ආයුධ නේටෝ (NATO) සංවිධානයේ මැදිහත්වීමෙන් යුක්රේනය සඳහා වෙන් කර තිබූ ඒවා වීම විශේෂත්වයකි. යුක්රේන ජනාධිපති වොලොඩිමියර් සෙලෙන්ස්කි පවසා ඇත්තේ මැදපෙරදිග කලාපයේ ඇමරිකානු හිතවාදී රටවල් විසින් දින තුනක් ඇතුළත ‘පේට්රියට්’ මිසයිල 800කට අධික ප්රමාණයක් භාවිතා කර ඇති බවයි. මෙය වසර හතරක් පුරා රුසියාව සමඟ පවතින යුද්ධයේදී යුක්රේනය භාවිතා කළ මුළු මිසයිල ප්රමාණයටත් වඩා වැඩි අගයකි.
මාසයක් පුරා ඇදී යන මෙම යුද්ධයේදී ඇමරිකානු මධ්යම අණසක (US Central Command) විසින් ඉරානය තුළ ඉලක්ක 9,000කට අධික ප්රමාණයකට ප්රහාර එල්ල කර ඇත. මෙම අවි ආයුධ හිඟය හේතුවෙන් යුක්රේනයේ ආරක්ෂාව පමණක් නොව උතුරු කොරියාව වැනි කලාපවල පවතින ඇමරිකානු යුද ශක්තිය කෙරෙහි ද දැඩි බලපෑමක් එල්ල වනු ඇතැයි ආරක්ෂක විශ්ලේෂකයෝ අනතුරු අඟවති.
