බ්රිතාන්ය මුහුදු සීමාව හරහා ගමන් කරන රුසියාවේ ‘සෙවනැලි නෞකා’ පරීක්ෂා කිරීමට සහ ඒවා අත්අඩංගුවට ගැනීමට බ්රිතාන්ය සන්නද්ධ බලකායන් දැන් “සූදානම්” බව එරට ආරක්ෂක ලේකම් ජෝන් හීලි (John Healey) අද (2026 මාර්තු 26) ප්රකාශ කළේය. යුක්රේන යුද්ධය සඳහා අරමුදල් රැස් කිරීමට සහ පනවා ඇති සම්බාධක මග හැරීමට රුසියාව වලංගු ජාතික ධජයක් නොමැතිව තෙල් ප්රවාහනය කරන මෙම නෞකා භාවිතා කරන බවට චෝදනා එල්ල වී තිබේ.
මෙම නෞකාවලට ඇතුළු වී ඒවා පරීක්ෂා කිරීම සඳහා අවශ්ය නීතිමය පදනම පසුගිය ජනවාරි මාසයේදී හඳුනාගෙන තිබුණද, ඒ සඳහා අග්රාමාත්ය ශ්රීමත් කීර් ස්ටාර්මර්ගේ (Sir Keir Starmer) නිල අනුමැතිය හිමි වූයේ අද දිනයේදීය. පවතින යුදමය වාතාවරණය හමුවේ රුසියානු ‘යුද යන්ත්රයට’ ලැබෙන නීති විරෝධී ලාභාංශ අවහිර කිරීම මෙම පියවරේ ප්රධාන අරමුණ බව අග්රාමාත්යවරයා අවධාරණය කළේය.
මේ සඳහා බ්රිතාන්යයේ විශේෂ බෝට්ටු සේවය (Special Boat Service) සහ රාජකීය මැරීන් භටයන් (Royal Marines) යොදා ගැනීමට නියමිත අතර, සන්නද්ධ කාර්ය මණ්ඩල සහිත නෞකාවලට ඇතුළු වන ආකාරය පිළිබඳ විශේෂ පුහුණුවක් ද ඔවුන් මේ වන විට සම්පූර්ණ කර ඇත. රුසියාවේ බොරතෙල්වලින් 75%ක්ම ප්රවාහනය කෙරෙන්නේ මෙවැනි පැරණි නෞකා මගින් බවත්, දැනට නෞකා 544කට පමණ සම්බාධක පනවා ඇති බවත් වාර්තා වේ.
