මෙටා (Meta) සමාගම විසින් WhatsApp පරිශීලකයින් සඳහා පණිවිඩ හුවමාරුව වඩාත් සුමට, බුද්ධිමත් සහ සංවිධානාත්මක කරන නව විශේෂාංග පෙළක් හඳුන්වා දී තිබේ. මෙහි ඇති වඩාත්ම කැපී පෙනෙන වෙනස වන්නේ මීට පෙර Android දුරකථනවලට පමණක් සීමා වී තිබූ එකම දුරකථනයක ගිණුම් දෙකක් (Accounts) භාවිතා කිරීමේ හැකියාව දැන් iOS පරිශීලකයින්ට ද නිල වශයෙන් හිමි වීමයි. මෙමඟින් රාජකාරි සහ පෞද්ගලික ජීවිතය සමබරව පවත්වාගෙන යාම සඳහා දුරකථන දෙකක් රැගෙන යාමේ අවශ්යතාවය මඟ හැරී යන අතර, තමන් දැනට සිටින්නේ කුමන ගිණුමේද යන්න පහසුවෙන් හඳුනා ගැනීමට පහළ තීරුවේ (Bottom tab) ඔබගේ පැරණි පැතිකඩ ඡායාරූපය දර්ශනය වනු ඇත.
මීට අමතරව ගබඩා පහසුකම් කළමනාකරණය කිරීම සඳහා ද නව ක්රමවේදයක් හඳුන්වා දී ඇති අතර, ඒ අනුව ඕනෑම සංවාදයක් (Chat) තුළ ඇති විශාල ගොනු පමණක් තෝරා මකා දැමීමට දැන් අවස්ථාව පවතී. මෙහිදී සම්පූර්ණ සංවාදයම මකා නොදමා අවශ්ය නම් මාධ්ය ගොනු (Media) පමණක් ඉවත් කර චැට් හිස්ට්රිය (Chat history) සුරක්ෂිත කර ගත හැකිය. එමෙන්ම ඔබගේ දුරකථනය මාරු කිරීමේදී දත්ත හුවමාරු කිරීමේ ක්රියාවලිය ද දැන් වඩාත් සරල කර ඇති අතර, නවතම යාවත්කාලීන කිරීම් සමඟ iOS සහ Android පද්ධති දෙක අතර ඉතා පහසුවෙන් සංවාද, ඡායාරූප සහ වීඩියෝ හුවමාරු කර ගැනීමේ පහසුකම සලසා දී තිබේ.
නව විශේෂාංග අතරට එක්ව ඇති ස්ටිකර් යෝජනා (Sticker suggestions) ක්රමය මඟින් ඔබ Emoji එකක් ටයිප් කරන විටම ඊට ගැළපෙන ස්ටිකර් ස්වයංක්රීයව පෙන්වන බැවින්, වඩාත් ප්රකාශනාත්මක ලෙස අදහස් හුවමාරු කර ගැනීමට මඟ පෑදේ. එමෙන්ම Meta AI තාක්ෂණය භාවිතා කර ඡායාරූප යැවීමට පෙර එහි පසුබිම වෙනස් කිරීම හෝ අනවශ්ය කොටස් ඉවත් කිරීම වැනි සංස්කරණයන් සංවාදය තුළදීම සිදු කළ හැකිය. මීට අමතරව AI ලිවීමේ සහාය (AI Writing Help) මඟින් ඔබගේ සංවාදයට ගැළපෙන පිළිතුරු පණිවිඩ කෙටුම්පත් කර දීමට ද කටයුතු කරයි. මෙම සියලුම විශේෂාංග මේ වන විට ලොව පුරා නිකුත් කරමින් පවතින අතර නුදුරේදීම සියලුම WhatsApp පරිශීලකයින්ට මෙය භාවිතා කිරීමට අවස්ථාව ලැබෙනු ඇත.
