ඩිජිටල් තාක්ෂණය ආරක්ෂිතව සහ වගකීම් සහගතව භාවිත කිරීම පිළිබඳව පාර්ලිමේන්තු මන්ත්රීවරුන් දැනුවත් කිරීමේ විශේෂ වැඩසටහනක් ශ්රී ලංකා පරිගණක හදිසි ප්රතිචාර දැක්වීමේ ඒකකය (Sri Lanka CERT) විසින් පවත්වනු ලැබීය. ජාතික පාලනය, ප්රතිපත්ති සම්පාදනය සහ මහජන සන්නිවේදනය සඳහා ඩිජිටල් වේදිකා තීරණාත්මක කාර්යභාරයක් ඉටු කරන වර්තමාන වටපිටාව තුළ, මහජන නියෝජිතයන්ගේ සයිබර් ආරක්ෂාව තහවුරු කිරීම මෙහි ප්රධාන අරමුණ වී තිබුණි.
සංවේදී තොරතුරු සහ ජාතික පද්ධති සමඟ කටයුතු කරන මන්ත්රීවරුන් ඉලක්ක කර ගනිමින් එල්ල විය හැකි තොරතුරු සොරකම් කිරීම් (Phishing), දත්ත උල්ලංඝනය කිරීම් සහ වැරදි තොරතුරු ප්රචාරණය කිරීම් වැනි සයිබර් තර්ජන පිළිබඳව මෙහිදී දීර්ඝ වශයෙන් සාකච්ඡා කෙරිණි. නියෝජ්ය කථානායක රිස්වි සාලිහ් සහ කාරක සභා නියෝජ්ය සභාපතිනී හේමාලි වීරසේකර මහත්මිය ඇතුළු ආණ්ඩු පක්ෂයේ සහ විපක්ෂයේ මන්ත්රීවරුන් පිරිසක් මෙම අවස්ථාවට එක්ව සිටියහ.
වැඩසටහන අතරතුර සයිබර් සනීපාරක්ෂාව (Cyber Hygiene), ආරක්ෂිත සබැඳි සන්නිවේදන ක්රමවේද සහ අන්තර්ජාලය තුළ ආරක්ෂිතව කටයුතු කිරීම සඳහා අවශ්ය හොඳම ප්රායෝගික පුරුදු පිළිබඳව මන්ත්රීවරුන්ට තාක්ෂණික මගපෙන්වීම් ලබා දෙන ලදී. ඩිජිටල් ආර්ථික අමාත්යාංශයේ ලේකම් වරුණ ශ්රී ධනපාල සහ ශ්රී ලංකා CERT ආයතනයේ සභාපති තිලක් පතිරගේ යන මහත්වරුන් ඇතුළු ප්රවීණ නිලධාරීන් කණ්ඩායමක් විසින් මෙම සැසි මෙහෙයවනු ලැබීය. රාජ්ය පාලනයේ සහ මහජන සේවයේ තීරණාත්මක අංගයක් ලෙස සයිබර් ආරක්ෂාව හඳුනා ගැනීම ජාතික ආරක්ෂාව තහවුරු කිරීමට මහෝපකාරී වනු ඇතැයි ශ්රී ලංකා CERT ආයතනය විශ්වාසය පළ කරයි.
