ඇමෙරිකානු ස්වදේශ ආරක්ෂක දෙපාර්තමේන්තුවේ (DHS) ආගමන විගමන නීති බලාත්මක කිරීමේ උපක්රම සම්බන්ධයෙන් දින 42ක් පුරා පැවති දැඩි දේශපාලන අර්බුදයකින් අනතුරුව, එම දෙපාර්තමේන්තුවේ බොහෝ අංශ සඳහා ප්රතිපාදන වෙන් කිරීමට එරට සෙනෙට් සභාව අද (2026 මාර්තු 27) අලුයම ඡන්දය ලබා දුන්නේය. කෙසේ වෙතත්, මෙම නව පනත මගින් එම දෙපාර්තමේන්තුවේ ප්රධාන ආගමන විගමන නීති ක්රියාත්මක කිරීමේ මෙහෙයුම් සඳහා මුදල් වෙන් කර නොමැති වීම විශේෂත්වයකි.
මින්නේපොලිස්හිදී (Minneapolis) ෆෙඩරල් නිලධාරීන් අතින් ඇමෙරිකානු පුරවැසියන් දෙදෙනෙකු ජීවිතක්ෂයට පත්වීමේ සිද්ධියෙන් පසු, අදාළ අංශයේ ප්රතිසංස්කරණ සිදු කරන ලෙස ඩිමොක්රටික් පාක්ෂිකයෝ දැඩි ලෙස බලකර සිටියහ. මෙම අරමුදල් වෙන් කිරීම ප්රමාද වීම හේතුවෙන් දස දහස් සංඛ්යාත රජයේ සේවකයන්ට වැටුප් රහිතව සේවය කිරීමට හෝ රැකියාවලින් ඉවත් වීමට සිදු වූ අතර, වසන්ත නිවාඩු කාලසීමාව (Spring break) තුළ ගුවන්තොටුපොළ රැසක දැඩි තදබදයක් සහ ප්රමාදයන් ද වාර්තා විය.
සෙනෙට් සභාවේ බහුතර නායක ජෝන් තූන් (John Thune) ඇතුළු පිරිසගේ මැදිහත්වීමෙන් සම්මත වූ මෙම පනත දැන් අවසන් අනුමැතිය සඳහා නියෝජිත මන්ත්රී මණ්ඩලය (House of Representatives) වෙත යොමු කර ඇත. ආගමන විගමන මෙහෙයුම් සඳහා අරමුදල් නොමැතිව මෙම දෙපාර්තමේන්තුව ඉදිරියට පවත්වාගෙන යාම තවදුරටත් අර්බුදකාරී විය හැකි බව දේශපාලන විචාරකයෝ පෙන්වා දෙති.
