ඉරාන යුද්ධය හේතුවෙන් ලෝක වෙළඳපොළේ ඉන්ධන සැපයුමට එල්ල වී ඇති බාධා හමුවේ ඉහළ යන තෙල් මිල පාලනය කිරීම සඳහා ඉන්දියානු රජය පෙට්රල් සහ ඩීසල් මත පනවා තිබූ විශේෂ නිෂ්පාදන බදු (Special Excise Duties) විශාල වශයෙන් අඩු කිරීමට පියවර ගෙන තිබේ. මැදපෙරදිග කලාපයේ පවතින අස්ථාවරත්වය සහ හෝර්මුස් සමුද්ර සන්ධිය ආශ්රිතව මතුව ඇති අවහිරතා හේතුවෙන් ඉන්ධන ආනයනයට එල්ල වී ඇති දැඩි බලපෑම අවම කිරීම මෙම තීරණයේ ප්රධාන අරමුණයි.
ඉන්දියානු මුදල් අමාත්යාංශය නිකුත් කළ නිවේදනයකට අනුව, පෙට්රල් ලීටරයක් සඳහා මෙතෙක් අය කළ රුපියල් 13ක විශේෂ බද්ද රුපියල් 3 දක්වා අඩු කර ඇති අතර, ඩීසල් ලීටරයක් සඳහා අය කළ රුපියල් 10ක බද්ද සම්පූර්ණයෙන්ම (ශුන්යය දක්වා) ඉවත් කර ඇත. මෙම බදු සහනය හේතුවෙන් ඉන්දියානු රජයට වසරකට ඉන්දියානු රුපියල් ට්රිලියන 1.55ක පමණ ආදායමක් අහිමි වනු ඇතැයි ආර්ථික විශේෂඥයෝ ඇස්තමේන්තු කරති. කෙසේ වෙතත්, මෙම පියවර හරහා එරට තෙල් සමාගම්වලට සිදුවන පාඩුව 30%ත් 40%ත් අතර ප්රමාණයකින් අවම කර ගැනීමට හැකි වනු ඇත.
ලොව තෙවන විශාලතම තෙල් පාරිභෝගිකයා වන ඉන්දියාව තම තෙල් අවශ්යතාවයෙන් 90%කට වඩා ආනයනය කරන අතර, ඉන් වැඩි ප්රමාණයක් මැදපෙරදිග කලාපයෙන් ලබා ගනී. ඉරාන යුද්ධය නිසා ඉන්ධන සහ ගෑස් සැපයුමට බාධා එල්ල වුවද, තම රටේ විදුලි උත්පාදනයට අවශ්ය ගල්අඟුරු සහ ඉදිරි වගා කන්නයට අවශ්ය පොහොර තොග ප්රමාණවත් පරිදි පවතින බව අග්රාමාත්ය නරේන්ද්ර මෝදි ප්රකාශ කර සිටී. ඉන්ධන මිල ස්ථාවරව පවත්වා ගැනීම හරහා එරට උද්ධමනය පාලනය කිරීමටත්, ජනතාවට සහන සැලසීමටත් ඉන්දියානු රජය මෙම තීරණාත්මක පියවර ගෙන ඇත.
